Natal 26 Des 2017 Sa Ressort

NATAL 26 DES 2017 19.30.00

H.K.B.P. KRAMAT JATI & H.K.B.P. GEDONG

ACARA IBADAH NATAL KEDUA


Acara Paduahon, Ari Natal Parningotan Hatutubu Ni Yesus Kristus

Tema :
“Baritahon haluaon na sian Jahowa ” /
“Kabarkanlah keselamatan yang dari Tuhan”

1. Salam dohot Joujou tu Pesta Hatutubu ni Tuhan Jesus

L : Sadari on 26 Desember 2017, i ma puncak ni sude las ni rohanta mamestahon Parningotan Hatutubu ni Tuhanta Jesus Kristus, di na sa-ressort on.
Marpungu do sude hita angka naporsea manghamauliatehon balga ni asi ni roha ni Debata na manongos AnakNa na sasada i gabe haluaon ni sandok manisia.
Antong sian hami Parhalado Partohonan na sa-ressort on, hupasahat hami ma Selamat Ari Natal nami tu hamu saluhutna:

Pr : “Selamat Ari Natal ma di hamu saluhutna! Didongani asi ni roha ni Tuhanta Jesus Kristus, dohot holong ni roha ni Debata Amanta dohot
parsaoran ni Tondi Parbadia ma hamu, ari on ro si saleleng ni lelengna!”

H : “Selamat Ari Natal ma nang di hamu angka amanami dohot inanami Parhalado Partohonan di huria on. Asi ni roha ni Tuhanta Jesus Kristus dohot holong
ni roha ni Debata Amanta dohot Parsaoran ni Tondi Parbadia ma nang mandongani hamu saluhutna!”

L : Manghalashon Ari Nauli ari Parningotan Hatutubu ni Tuhan Jesus Kristus sadari on, marsihorasan jala masijalangan ma hita di bagasan dame
dohot las ni roha.

H : (Hehe, jongjong masijalangan ma sude ruas ni huria, laos hundul ma nang angka parhalado marsitopot angka ingananna be!)
SL : (Mangendehon) “We wish you a Merry Christmas!” 2x

S : (Endehon : “Selamat Ari Natal”):
(Selamat Ari Natal, Selamat Ari Natal, Selamat Ari Natal dohot Taon Baru) 2x

L : Hundul ma hamu saluhutna! Hamu angka dongan, taolophon jala taendehon ma hajujumpang ni Pesta Parningotan Hatutubu ni Tuhanta Jesus
Kristus sadari on, marhite na marende sian Buku Ende No.57:1-3 na mangihut :

2. Marende Huria sian BE. 57 : 1 – 3
“Nunga jumpang muse” BL.202

1. Nunga jumpang muse ari pesta i, Hatutubu ni Tuhanta Jesus i,
Tuat di Ibana sian surgo i, mebat tu hita on
Hasangapon di Debata, dame, dame ma di jolma, Las ni roha ni Debata hajolmaon muse.

2. Beta ale dongan tu Betlehem i, ita somba ma dakdanak na disi
Na tinongos ni Parasiroha i, Debata Ama i.

Hasangapon di Debata
dame, dame ma di jolma, Las ni roha ni Debata hajolmaon muse.

…musik…

3. Sombanami ma di Ho, na tubu on, Ho siboan dame tu portibi on,
ruas jongjong

Sai pasaorhon ma tu roha nami on, DameMi, o Jesus.

Hasangapon di Debata…….
dame, dame ma di jolma, Las ni roha ni Debata hajolmaon muse.

3. Votum – Introitus – Tangiang
L : Tapungka ma Ibadah Pesta Parningotan Hatutubu ni Tuhanta Jesus Kristus di hurianta sadari on marhite sahap sian Goar ni Tuhanta. Taparade ma rohanta
marsomba tu Debatanta!

SL : Mangendehon BE No.615 : 1
“Tarbege surusuruan marende”
Tarbege surusuruan marende mansai uli
Angka dolok dohot rura gok do saringar na i

S : (Mangendehon Reff) :
Sa…..ngap ma Sangap ma di Tuhan. Sa…..ngap ma Sangap ma di Tuhan

L : Nunga tubu di hita sada posoposo, dilehon tu hita sada Anak, pampe tu abaraNa do sogot harajaon, jala bahenonna GoarNa: Sipartahi
halongangan, Ulubalang ni Debata Ama, salelengni-lelengna, Raja ni hadameon. Endehon hamu sada ende na imbaru di Jahowa, ale sandok tano on. Pajojor hamu
ma di tongatonga ni angka sipelebegu hamuliaonNa i, di tongatonga ni saluhut bangso halongangan, angka na binahenNa i. Marsomba ma hamu tu Jahowa
marpahean na marhadohoan, angka hitir ma hamu maradophon Ibana, ale isi ni sandok tano on.

H : Haleluya….. Haleluya….. Haleluya….

L : Martangiang ma hita :
“Ale Debata Amanami na di banua ginjang! Mandok mauliate do hami tu Ho, ala ni godang ni asi ni rohaM di hami; ai dibasabasahon Ho do
AnakMu na sasada i tu hami na di pardangolan on, asa malua hami marhitehite Ibana sian dosa dohot sian hamatean saleleng ni lelengna. Hupangido hami tu Ho,
sai sondangi ma rohanami na holom i marhitehite Tondi Parbadia i; angkup ni i, sai parrohai ma hami, asa huboto hami mandok mauliate tu Ho, asa tarapul situtu
rohanami di hagogotan dohot pangunjunan marhitehite AnakMu, Tuhan Jesus Kristus Tuhannami. Amen.

— Hundul —

4. Marende Huria sian BE. No.46:1+10
“Na sian Ginjang do Au”
BL.33

L : Nunga ro barita na uli sian banua ginjang, i ma taringot tu hatutubu ni Tuhanta, Jesus Kristus Sipalua i. Jangkon ma Ibana bongot tu roham.

1. Na sian ginjang do au ro barita na imbaru do
Huhut na uli situtu huboan tu sude hamu

10. O Jesus, haholonganki, bongoti dohot rohangki
Pabali sian i sude na tau mangago au muse

5. Manjaha Patik ni Debata (Ba=Baoa; Br=Boru)

L : Patik ni Debata di Pesta paduahon Parningotan Hatutubu ni Tuhanta Jesus sadarion tarsurat di Lukas 2:10 didok songon on : “Alai didok surusuruan i ma
tu nasida;

Ba : Unang mabiar hamu; ai barita halalas ni roha godang do huboan tu hamuna, parsaulian ni sandok bangso i.

Br : Ai naung tubu do di hamu saborngin on, di huta ni si Daud, Sipalua i, i ma Kristus, Tuhan i”
L : Antong rap mangido gogo ma hita tu Tuhanta asa tarulahon hita Tona ni Debata.
S : Ale Tuhan Debata, sai pargogoi ma hami mangulahon na hombar tu HataMi. Amen!

6. Marende Huria sian BE. No.47:2+4
“Aut Na Saribu Hali”
BL.103

L : Mansai lea do hatutubu ni Sipalua i uju i, i ma di bara ni pinahan. Alai na sangap do Ibana jala marmulia, ai Ibana do Panondang ni portibion.
Jangkon ma Ibana, so tung unang lea roham mida hametmetonNa i. Endehon ma i jala hobasi dirim manopoti dosam tu Debata.

2. Ianggo ho ale tondingku sai jangkon ma Panondang i
Sai unang ma lea rohamu dibaen hametmetonNa i
PabalionNa do sude sibolis dohot dosa pe

— huria jongjong —

4. Dibahen i sai marsinondang ma baen haporseaonmi
Padenggan jala sai patorang roham ro di parangemi
Paboa na marguna do Panondang na ro i di ho

7. Manopoti Dosa

L :
Di na jongjong hita di mata ni Pesta Parningotan Hatutubu ni Tuhanta Jesus sadarion tama taingot jala tatopoti dosa, hahurangan dohot pangalaosionta tu Debata.
Ala ni i hohom ma jolo hita satongkin songon na manulingkiti rohanta!

—– Saat Teduh —–

L : Ale Debata Amanami na di banua ginjang! Diparhatopot rohanami do balga ni holong dohot asi ni rohaM di hami. Dilehon Ho do AnakMu Tuhan
Jesus Kristus tu portibi on, tubu di bagasan haleaon, manaon na porsuk pola ingkon mate tarsilang asa gabe haluaon di hami. Dia ma naung hubahen hami tu Ho
balos ni i ?

Jotjot do mabalga hu “uari” manang janji nami tu Ho, hape ndang tulus i huulahon hami. Molo jumpang ari Natal si songon on, sai maruari do hami marhite angka
ende nami mandok: “Hulehon di Ibana sude na di au on. Olo, olo sude na di au on!” Hape dia ma naung hulehon hami huroha tu Ho ale Tuhan? So ndada gabe
tardapot hami angka pargabus di joloM? Molo tung i pe, sai asi roham di hami, sesa dosanami!

H : (Endehon lambat!) sian BE No.53:2
“Di Betlehem Do Tubu”
BL.51

Tu holong ni rohaNa Hubonom rohangkon;
Hulehon di Ibana sude na di au on.
Olo, olo sude na di au on

L : Ganup jumpang ari Natal sisongon on sai huendehon hami do: “Sai naeng haholonganku, Ho ale Tuhanki! Nang marsak, las rohangku ingkon lam
ganda i…!” Hape sabalikna di huulahon hami : Jotjot ndang huhaholongi hami Ho, sian nasa roha, ateate, pikkiran, dohot sian nasa gogo nami; suang songon i
ndang huhaholongi hami dongannami doshon dirinami, nang lumobi angka musunami, Holan di masa ni pangunjunan, sitaonon, arsak, parungkilon do huringkoti
hami Ho. Molo adong di hami be, nunga pintor ro ginjang ni roha; molo so jumpang pinangido ni roha nunga pintor mandele laos manundalhon Ho. Jotjot tahe
Tuhan tardapot hami gabe angka jolma pargabus. Asi rohaM di hami, pargogoi hami manghaholongi Ho dohot angka dongannami lumobi nang musunami!

H : (Endehon lambat!) sian BE No.53:3
“Di Betlehem Do Tubu”
BL.51

Sai naeng haholonganku, Ho ale Tuhanki!
Nang marsak las rohangku, ingkon lam ganda I
Olo, olo ingkon lam ganda i

L : Ale Tuhan Debata,mansai burju do Ho mamasumasu ngolunami: di parianakhonon, di ulaon si ganup ari, jabatan, karier, prestasi kerja; dilehon
Ho do di hami arta, sinamot, pansarian na tama, paruntungan, parlabaan dohot lan na asing, atik pe jotjot sai huparsoada hami do i na songon pasupasuM. Hape dia
ma haburjuonnami naung hulehon hami tu Ho dohot tu HuriaM balos ni naung hujalo hami suksuk sian Ho?

Hata ni ende, na sai huendehon hami ganup jumpang ari

Natal mandok: “Burju naeng lehononku di Ho rohangkinon…”. Tung adong ma haburjuonnami tu Ho Tuhan? Tung naung hulehon hami ma huroha “rohanami” tu Ho?
Molo tung adong hupelehonnami peleannami, pintor tuk ma i balos ni pasupasuM na sai godang i? Ale Tuhan ajari hami asa burju mangalehon rohanami dohot
dirinami tu Ho!

H : Mangendehon BE. No.53:4
“Di Betlehem Do Tubu”
BL.51

Burju naeng lehononku di Ho rohangkinon
Asi rohaM Tuhanku urupi au tongtong,
Olo, olo urupi au tongtong

L : Hamu angka dongan! Nian asing ni angka naung taparhatopot nangkin, godang dope dosa dohot pangalaosionta tu Debata; ndang tarpajojor hita
i sadasada di ari on. Alai tung dia pe dosanta di adopan ni Debata, barita nauli di hita ari Pesta Hatutubu ni Tuhanta Jesus Kristus on mandok :

L+H: “Ai naung tubu do di hamu saborngin on, di huta ni si Daud, Sipalua i, i ma Kristus, Tuhan i!”

L : Pos ma rohamuna! Pabotohononku do tu hamu barita halalas ni roha godang sadari on, i ma bagabaga ni Debata taringot tu hasesaan ni
dosanta: “Songon on do panghaholongi ni Debata di portibi on, pola do AnakNa na sasada i dilehonm asa unang mago ganup na porsea di Ibana, asa hangoluan na
saleleng ni lelengna di Ibana”. Hasangapon ma di Debata na di ginjang. Amen!

— huria hundul —

8. Marende sian BE. No.52 : 1 – 2
“Hataon do Las ni Roha Do”
BL.55

1. Hatuaon do las ni roha do, hatutubu ni Jesus I
Mago do jolma ro ma Tuhanta
Las be las be ma rohanta i (2x)

2. Hatuaon do las ni roha do, Hatutubu ni Jesus i
Domu do hita tu Debatanta,
Las be las be ma rohanta i (2x)

9. Manjaha Epistel
L : Rap ma hita manjaha turpuk Epistel di pesta Natal paduahonon secara responsoria, i ma na tarsurat di

Heber 1 : 1 – 3a :

Jotjot jala ragam najolo pambahen ni Debata mangkuling i angka ama i marhitehite angka panurirang i

H : Alai di angka ari na parpudi on dipanghulingi do hita marhite sian Anak i. Ibana do dipabangkit gabe sitean parluhutan i, jala marhitehite Ibana do
ditompa angka hasiangan i.

L/R : Sillam ni hasangaponna dohot suman ni hadirionna do Ibana, jala diusung do parluhutan i marhitehite hatana na marhagogoon i..

L : I ma sahat na, Martua do angka na tumangihon Hata ni Debata, jala na umpeopsa.

L/R : Amen

10. Marende Huria sian BE. No.48 : 2 – 3
“Ria Ma Hita Sasude”
BL.16

L : Marhite hatutubu ni Jesus, Sipalua i nunga mungkap dalanta tu banua ginjang; hita na mian di pardangolan dapotan asiasi
dohot panghirimon. Tahalashon ma haroroNa i tu hasiangan on marhite endenta, laos tahatindanghon haporseaonta i.

2. Diungkap Debatanta do Banuaginjang i,
Disuru do AnakNa i, Hangoluanta i, Hangoluanta i
— huria jongjong —

3. Ampuan ni Amana do tinadingkonna i
Tu hasiangan on do ro, tu pardangolan i, tu pardangolan i

11. Manghatindanghon haporseaon

L : Tahatindanghon ma haporseaonta i songon na hinatindanghon ni donganta sahaporseaon di sandok portibion, rap ma hita mandok.
L+H : Ahu porsea……………

— hundul —

12. Marende Huria sian BE. No.49 : 1…dst-
“Sai Ro Ma Tu Bara”
BL.47
(Papungu Pelean Ia dohot Ib)

L : Bara ni pinahan na di huta Betlehem, i do hatutubu ni Kristus i. Mansai uli rupana, marsinondang bohiNa jala gok hadameon. Ro ma hita tu
Betlehem marsomba ma hita songon parmahan i. Antong, tajangkon ma Ibana marhite na paradehon ngolunta gabe “bara ni pinahan” hatubuan ni Sipalua i.
Tapasahat nang peleanta, las ni rohanta mangjangkon hatutubuNa!

1. Sai ro ma tu bara di Betlehem on, hamu na porsea hatop ma tu son
Marnida halasan ni rohanta i, tinongos ni Ama na di surgo i

— musik —

2. O ida hamu ma di bara inon, Dakdanak na tubu disi borngin on
Uli do rupaNa mataNa tiur, o bereng Ibana, ho gabe tiur

— musik —

3. Las roha Maria nang Joseph disi, marnida na metmet na sorang tusi
Marsomba tu patNa do parmahan i, di ginjang marende pardisurgo i

— musik —

4. Pasinggang ma totmu hamuna sude, maniru parmahan marsomba muse
Marende hamu, na marlas roha i, maniru suruan na di ginjang i – musik –

— musik —

5. Sai dok ma O Anak ni Debata i, Ho ro sian ginjang dibaen AsiMi
Di hami sudena na mardosa on, mambaen haluaon di hami tongtong

— musik —

6. Tung aha ulaning denggan ni rohaM, silehononnami baen las ni rohaM
Nang sere, nang perak, ndang pinangidoM, ai roha na ias sambing do lomoM

— musik —

13. Jamita : Psalmen 98 : 2 – 9
oleh : Pdt. L.H.M. Simanjuntak, D.Min

14. Marende Huria sian BE. No.616:1–3 “Uli Na I Borngin Na Badia”
( Papungu Pelean II tu Radio Bona Pasogit FM HKBP )

L : Di hatutubu Jesus i, humirdophirdop do bintang di langit i, i ma bintang ni Tuhan i, na patuduhon Raja Bolon do na tubu i, na ro sian banua
ginjang i. I do patudu dalan tu Parroha na sian purba asa sahat tu bara i. Jesus Kristus do Panondang naung ro tu portibi on (Joh.8:12), jangkon ma Ibana asa
disondangi roham jala tiur ngolum dohot ngolungolum tujoloan on. Endehon ma “Uli na i di borngin na badia”

1. Uli na i di borngin na badia, humirdophirdop do bintang disi
Di borngin i do tubu Sipalua di panggagatan di Betlehem i
Portibi on dangol gok haholomon marnida sondang ni Tuhanta i

Reff : Uli na i marende do suruan di borngin i do tubu Kristus i
Di borngin i do tubu Kristus i

— musik —

2. Sian na dao parroha sian purba ro do tinogihon ni bintang i
Marsinggang be nasida lao marsomba tu Jesus Kristus Sipalua i
Ibana ro sian banua ginjang laho paluahon hita jolma i

Reff : Uli na i marende do suruan di borngin i do tubu Kristus i
Di borngin i do tubu Kristus i

— musik —

3. Uli na i sude marlas ni roha ala naung songgop harajaonNa i
Huria i ria do ro marsomba mamuji Raja na sun sangap i
Ibana do panondang hangoluan, na mangalehon panghirimon i

Reff : Uli na i marende do suruan di borngin i do tubu Kristus i
Di borngin i do tubu Kristus i
— musik —

15. Parsuruon Tu Ngolu Siapari

Pdt : “Gabe daging ma Hata i jala maringan di tongatonga ni hita on…!” On ma barita Natal mangihuthon si Johannes, laos i do nang panghorhon ni
pesta Natal di hita, asa tapatuduhon Jesus Kristus i “mangolu” di bagasan diri, keluarga dohot hurianta. Antong tajangkon ma Ibana mian di bagasan ngolunta dohot
keluargatanta; taboan ma Ibana mulak sian parpestaan on tu angka bagasta asa mian ibana di tongatonganta ganup ari.

H : (Mangendehon BE No.614:1 “Ro ma Ho tu au” )
Ro ma Ho tu au O Jesus Tuhanki, sian banua ginjang tu rohangki
Ro ma Ho tu au O Tuhan Sipalua i, dame binoanMu ndang na tarasam i,
O Tuhanki

Pdt : Di bagasan partondionta nunga dohot hita nuaeng jongjong di bara ni pinahan na di Betlehem i; di adopanta do posoposo i, i ma Jesus Kristus
Tuhanta i. Somba ma Ibana marhite ngolum dohot ulaonmu, parangehon hataNa, mangolu ma ho di bagasan dame na sian Tuhanta i. I ma kado silehonlehonmu tu
Jesus na sorang i.

H : (Mangendehon BE No.614:2 “Ro ma Ho tu au” )
Asi ma rohaM di au O Tuhanki, sai jalo ma tangiang nang endengki // Songon si Maria ina na martua i, baen nang au martua ala haroroMi // O Tuhanki

Pdt : Marhite naung tapangan roti jala tainum anggur parpadanan na sian Tuhan Jesus Kristus. Antong tapardagingkon ma pamatang ni Jesus Kristus i
jala taparmudarhon ma nang mudarNa i. Antong patuduhon ma i marhite pangalahom dohot bangkom siganup ari maniru Tuhan Jesus Kristus.

H : (Mangendehon BE No.614:4 “Ro ma Ho tu au” )
Nang parhapistaran sian purba i, manungkap do marsomba tu Tuhan I
Sere dohot na angur ro di haminjom i, dipelehon tu Ho Raja na sorang I
O Tuhanki

16. Tangiang Pelean – Hatutubu – Ale Amanami – Pasupasu – Amen

17. Masijalangan

SUDE PANDITA DOHOT PARHALADO SARESORT
Pasahathon :

Selamat Ari Natal – 25 Desember 2017

Tu saluhut :

RUAS NI HURIA NA SA – RESSORT ON :
HKBP KRAMAT JATI
HKBP GEDONG

“ Sai disondangi asi dohot holong ni roha ni Debata ma hita saluhutna “


***persembahan pujian, Koor, Paduan Suara, Par-Jamita, Harentaon, P.Pelean 

sumber acara : Pendeta A. Siahaan S,Th :

ACARA NATAL PADUAHON SA-RESSORT


(Informasi sifatnya tidak melebihi sumber para ahli)

: Acara & Petugas Layanan tidak bersifat permanen – atau jika ada yang berhalangan.

Posted in natalTagged , , , ,