Advent 1 November 27 2016 hkbp kramatjati

hkbp kramat jati

‘Advent 1 November 27 2016 hkbp kramatjati’

Manghuling organ angonangon. BE. 593

  1. Joujou tu Parsaoran: (L: Liturgis; H: Huria)

L:    Hamu dongan sahaporseaon di bagasan Jesus Kristus! Sadarion sahat ma hita tu Taon Baru parhuriaon. Tama do pasahatonta pamujion dohot mauliate ni rohanta tu Debata, ala ni pangaramaotionNa di bagasan taon parhuriaon naung salpu i.

H:   Tapuji ma Tuhanta naung patolhashon hita tu bagasan Taon Baru Parhuriaon on.

L:    Laos di bagasan Minggu on ma hita sahat tu Advent na parjolo, ima di na manomunomu di parningotan di hatutubu ni Tuhan Jesus dohot na maimaimahon haroro ni Kristus na paduahalihon.

 

H:   Tapuji ma Tuhanta naung patolhashon hita tu Minggu Advent on.

 

L:    Ida ma, nunga ro hatuaonmi. Ida ma, ihut tu Ibana do upa silehononNa, jala pamalosonna di joloNa.

 

H:   Ho do ale Jahowa dihalungunhon rohangku, ale Debatangku, marhaposan tu Ho do ahu.

 

L:    Endehon hamu ma Debata, puji hamu ma GoarNa, palendes hamu ma dalan di Ibana.

 

H:   Ho do ale Jahowa dihalungunhon rohangku, ale Debatangku, marhaposan tu Ho do ahu.

 

L:    Marolopolop jala marlasniroha ma hita manomunomu Raja hamuliaon i. (Pagalak Lilin huhut mandok) Hupagalak ma lilin on songon partanda haradeon ni rohanta managam haroro ni Raja hamaulion i na mamboan hatiuron tu portibion, tahobasi ma rohanta marsaor tumangihon HataNa, ro be ma hita mardongan las ni roha mamuji Ibana. Marende ma hita!

 

  1. Marende BE. 44:1–3 “O Tondi Porbadia i, bongoti”   206

Hamuna na porsea i, sai tomu Tuhan Jesus i.

Pahehe rohamuna. Jonok do ari pesta i, saluhut huriaNa i

Ima hatutubuNa. Ipe hehe, ma hamuna, baen pantunna

Lao manjangkon, na manopot hajolmaon

 

Marlas ni roha situtu, saluhut halak na burju

Lao mangihuthon Jesus. Ipe pataridahon ma

Las ni roham di Debata, sangkapNa ma patulus

Puji, puji, Jesus Kristus na manobus tondimuna

Sian hamagoanmuna

—–musik—–                 (jongjong)

Sigati rohamuna be, sai tanda dosa mu sude

Paringkot rohamuna. Manjangkon Sipalua i

Na tuat sian surgo i, manggarar utangmuna

Tanda, hata, hangoluan na binoan ni Tuhanta

Na pasae sude dosanta

 

  1. Votum – Introitus – Tangiang

L :       Marhitehite goar ni Debata Ama, dohot goar ni AnakNa Tuhan Jesus Kristus dohot goar ni Tondi Parbadia na tumompa langit dohot tano on.

 

L+H: Amen.            

 

L :       Ho do ale Jahowa dihalungunhon rohangku. Ale Debatangku, marhaposan tu Ho do ahu, sai unang paila ahu, asa unang marsuraksurak angka musungku mida ahu.

 

H :      Ndang tahe tagamon tarurak manang ise sian angka na manghaposi Ho, ale Jahowa, sai pabotohon ma tu ahu angka dalanMu, jala ajarhon tu ahu angka bogasMu.

 

L:                    Sadarion ma ro Tuhan i, manopot joroNa, beta, tasomba ma Ibana.

 

H        :           Marolopolop ma ho jala marlas ni roha, ale boru Sion.

L :       Ai ida ma, na ro ma Ahu maringanan di tongatongami, ninna Jahowa. Haleluya!

 

H        :           (Mangendehon) Haleluya, Haleluya, Haleluya

 

L:        Martangiang ma hita! Ale Tuhan Debata, Pargogo na so hatudosan, na tumompa langit dohot tano, hinorhon ni asi ni rohaM do umbahen sahat hami tu taon Huria na imbaru on. Lehon ma tu HuriaM TondiM na badia i dohot hamaloon sian Ho, asa lam rarat jala ganda harajaonMu di tongatonga ni hami on. Sai lehon ma hiras ni roha tu naposoM mangkatahon HataM, asa lam denggan HuriaM marhite sian i. Pargogoi ma hami mangoloi Ho di bagasan haporseaon na tongtong, asa manahan hami sahat ro di ujungna marhitehite AnakMu Jesus Kristus Tuhannami. Amen

(Hundul)

  1. Marende 590 : 1+2    “Advent“       

Advent ido di tingki on, na marsaringar di taon on

Ingkon rade oroan i, managam Sipalua i

Advent, Advent, na ro ma Tuhan i

Antong tagam ma.

 

Advent, gok olopolop do, di parlangitan i

Mandok na ro ma Tuhan i, manopot huriaNa i

Advent, Advent, na ro ma Tuhan i

Antong tagam ma.

 

  1. Patik :

L:          Tangihon hamu ma patik ni Debata di Minggu sadari on, ima na tarsurat di Pilippi 1 : 27-28, songonon ma didok disi:  Asal tu barita na uli ni Kristus ma pahombar hamu parsaoranmuna, asa huida di hamu, di na ro i ahu, manang hubege taringot tu hamu, tagan padaodao dope, paboa na hot hamu jongjong di bagasan hasadaon ni tondi jala rap marungkil, marsada ni roha mangkaporseai barita na uli.Tung unang ma olo hamu pambibiaran ni angka alo di agia aha pe; tanda ni hamagoanna ma i di nasida, alai di hamu tanda ni haluaon do, jala sian Debata do i.

L:  Antong, rap mangido gogo ma hita sian Tuhan Debata.

 L+H: Ale Tuhan Debata sai pargogoi ma hami mangulahon na hombar tu patikMi. Amen.

 

  1. Marende BE. 39 : 6 + 8 “Beha ma panjalongku”        156                                                

Hamu na holso roha, binaen ni dosa i

Tangihon boaboa na sian surgo i

Naung ro do Sipalua disuru Ama i

Pasonang rohamuna, mamboan dame i

—–jongjong—-

Ro do Ibana sogot di ari uhum i

Ingkon di si tarsonggot pardosa na tois i

Alai na holong roha, marlas ni roha do

Di si ma dohononna pinuji Ho na ro

 

  1. Manopoti Dosa

L:          Hamuna angka dongan na hinaholongan di bagasan Jesus Kristus! Di bagasan unduk dohot serep ni roha tatopoti ma dosanta, martangiang ma hita:

 

              Ale Jahowa Debata nami, na badia. Asi ni rohaM do na sai tongtong mandongani huhut mangaramoti hami. Alai jotjot do tondinami tarela tu angka parulaon na so tama di adopanMu. Sai holan hasonangan nami sambing do hulului hami. Mansai jotjot dope hami tarela tu portibi on.

 

H:         Gok dosa do pardalanan ni ngolu nami tartait tu dosa dohot tu hamagoan. Tung lea situtu do hami di adopanMu marhite angka pambahenan nami i.

 

L:          Gabe rumar do hubaen hami ngolu nami naung pinaluaMi. Holan tu asi ni rohaM nama hami ro jala mangido hasesaan ni angka dosanami i.

 

H:       (Mangendehon) BE. 683:1  “Di adopanMu Jesus”  BL.683                     

              Di adopanMu Jesus, lea tutu do diringkon

              Dibaen godang ni dosangkon, di adopanMu Jesus

 

L:          Ale Tuhan di bagasan ngolu nami on, mansai jotjot do hami manguhumi, manghosomi, mangaleai. Gabe maol dapot dame na sian Ho i di ngolunami.

 

H:         Sai tubu dope di hami na mabahen hansit roha ni dongan, ndang marpambahenan, jala ndang huula hami na hinalomohon ni rohaM. Hata nang pambahenan nami jojot mambahen hansit roha ni dongan nami.

 

L:          Hurang dope pangargahonon nami di angka dongan jolma, gabe dao ma ngolu nami di bagasan ngolu na masihaholongan songon na pinangido mi sian hami.

 

H:         Ale Tuhannami, parasi roha na sintong do Ho. Gok do asi ni rohaM saleleng ni lelengna. Asi ma rohaM di hami na lea on.

 

L:          Sai unang paingotingot be dosa dohot hajahatonnami. Jotjot do hami mardosa maradophon Ho jala hulaosi hami patikMu. Lehon ma asi ni rohaM maradophon hami jala urupi ma hami. O Tuhan mual ni hatuaonnami, salpuhon ma sude angka pangalaosion nami, marhitehite anak haholongan ni roham Tuhan Jesus Kristus Tuhan nami. Amen

 

(Tangiang na hohom, manghuling organ nanget: BE. 683)

 

L:          Bagabaga ni Debata, taringot tu hasesaan ni dosanta: Songon on do panghaholongi ni Debata di portibi on, pola do AnakNa na sasada i dilehon, asa unang mago ganup na porsea di Ibana, asa hangoluan na saleleng ni lelengna di ibana.

Hasangapon ma di Debata na di ginjang! Amen

(Hundul)

 

  1. Marende BE. 42 : 3 – 4 “Hamu sude, naung tinoruan”   216

Na ro ma Rajami, sai jangkon; Ibana tu roham ale

hasangaponNa ditadingkon, mambuat dangolmi tahe

Antong sai tiop ma tanganNa, paboa na nirajaanNa

Huhut niramotanNa ho. Mangmanghon ma burjum, paboa

Tundalhononmu do na roa, lao mangoloi Rajam naung ro

 

Gok situtu hamoraonmu di Jesus Kristus Tuhanmi;

Tangkas ma i naeng etongonmu, gotaphon sian rohami

Luhut na olo mago sogot, ai ingkon gabe parsidohot

Ho tu banuaginjang i. Saonari do halehetanna,

Na jumpang ho hadenggananna; Sai jangkon Jesus Tuhanmi

 

  1. Epistel :

L:         Tabege ma Hata ni Debata turpuk ni ari Minggu on  i ma tarsurat di Mateus 24: 36 – 44, tajaha ma marsorinsorin:

Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i; nda holan Ama i!

 

    H:       Alai songon uju di ngolu ni si Noak i, songon i do sogot haroro ni Anak ni jolma i!

L:        Ai tagan so ro aek na sumar i, marmangani nasida jala minumminum, mangoli dohot pabolihonsa, paima dapot ari habobongot ni si Noak tubagasan parau i.

 

    H:       Laos so mamoto nasida, paima ro aek na sumar i mangaupi nasida saluhutna. Suman tusi do sogot haroro ni Anak ni jolma i!

 

L:        Rap ma disi dua halak di ladang; na sada do dijangkon, na sada dibolongkon.

 

H:        Rap ma disi dua panduda; na sada do dijangkon, na sada dibolongkon.

 

L:         Onpe, dungo ma hamu; ai ndang diboto hamu ari haroro ni Tuhanmuna!

 

    H:       Alai ingot hamu ma on: Aut na diboto na mora i tingki haroro ni panangko, ndang tagamon so dungo ibana, asa unang disursari ugasanna na di bagasna i.

 

L:        Dibahen i sai tagam ma hamu, ai na ro ma Anak ni jolma i di na so pangkirimon ni rohamu!

I ma sahatna, Martua do angka na tumangihon Hata ni Debata jala naumpeopsa.

L+H:     Amen.

 

  1. Marende BE. 45 : 5 + 7 “Hosianna Anak ni” 73                                 

Hosianna, saut ma baen bagabaga ni Jahowa

Nang buni dope nuaeng hasangaponMi di jolma

Angka na porsea i do mananda gogoMi

 

——-Musik——  (Jongjong)

 

Hosiana Anak ni  Debata na gabe jolma

Topot ma HuriaMi,  asa sai tongtong martua                  

Sangap ma di GoarMi salelenglelengnai

 

  1. Manghatindanghon Haporseaon

L:            Dibagasan sada panindangion dohot donganta sahaporseaon di sandok portibion tahatindanghon ma haporseaonta i, rap ma hita mandok:

L+H:      Ahu  porsea di Debata Jahowa………

(Hundul)

 

  1. Koor
  2. Tingting
  3. Koor :
  4. Marende BE. 539:1— “Sai hutagam do Tuhanku”    371                              

                Pelean Ia + Ib

Sai hutagam do Tuhanku, sai masihol rohangki

Diharoro ni Tuhangku songon na nidokNa i

Sai mardongan olopolop huriaM managam Ho

Maranata ro, o Tuhan, amen, sai tibu ma ro!

 

Las ni roha ndang hapalang do manggohi rohangki

Dung binege soaraNa di na ro Tuhanta i

Sai mardongan olopolop huriaM managam Ho

Maranata, ro, o Tuhan, Amen, sai tibu ma ro!

—–musik—–

Sai rade, ale tondingku, tagam panjouonNa i,

Sai tu langit an manomu ho di Jesus Tuhanmi

Sai mardongan olopolop huriaM managam Ho

Maranata, ro, o Tuhan, Amen, sai tibu ma ro!

 

Ai tagamon nunga borhat, Ho, Tuhanku, sian i?

So tung unang au tarlalap, tading di na rodop i

Sai mardongan olopolop huriaM managam Ho

Maranata, ro, o Tuhan, Amen, sai tibu ma ro!

 

  1. Jamita: Jesaya 2 : 1 – 5
  2. Marende BE. 591 : 1— “Boru Sion” 591

       Pelean II tu Haporluan Distrik

 

                        Boru Sion las roham las roham Jerusalem.

Ai na ro do Raja mi padamehon ho tongtong

Boru sion las roham las roham Jerusalem.

 

                Anak Daud ro ma Ho, pasu-pasu bangsoMon,

                HarajaonMu hot tongtong dame ma di tano on,

                Hosianna ro ma Ho, pasu-pasu bangsoMon.

                      —————-Musik———————

 

                     Hosianna ro ma Ho, masuk Ho tu rohangkon,

Baen mardame tondingkon, lao manjangkon haroroM,

Anak Daud ro ma Ho! Masuk Ho tu rohangkon.

 

  1. Parsuruon (P: Parjamita; H: Huria)

P:        Lehon ma tu HuriaM TondiM na badia i dohot habisuhon na sian Ho i, asa lam rarat jala ganda harajaonMu di tongatonga ni hami on.

 

H:       Sai pabotohononMu do tu hami dalan hangoluan, asa gok dame dohot las ni roha hami di adopan ni bohiM, ai angka hasudungan ni rohaM do di siamunMu saleleng ni lelengna.

 

P:        Padungo ma hami jala paringgas hami martangiang, huhut asa marlas ni roha hami paimaimahon Ho, jala asa dapot hami hangoluan na so ra suda naung pinaradem di hami.

 

P+H:  (Mangendehon) BE. 43 : 4  “Padiri rohamuna”  BL .154

                   Asi rohaM Tuhanhu parade ma au on,

            Manjangkon tu rohangku Ho hatuaonhon,

            Bongoti rohangkon, di si ma Ho maringan,

            Sai Ho ma ale Tuhan nampuna au tongtong.

 

  1. Tangiang Pelean (Agenda) – Ende Pelean – Tangiang Minggu Advent  – Tangiang Ale Amanami – Pasupasu 

Amen-Amen-  Amen.

Posted in Acara dan Kegiatan, Advent, Buku Acara, Kebaktian Minggu