Acara Kebaktian 31 ujung taun 2016

31 desember 2016

Acara Ujung Taun 2016

18-img-hkbpkrjati

 

Tema : “DAPOTAN SONDANG HANGOLUAN DO NA MANGIHUTHON JESUS” (Johannes 8 : 12 – 19)

Tangiang na hohom – Saat teduh

1. JOUJOU MARSAOR DOHOT TUHAN I (L : Liturgis; R : Ruas)
L : Hamu dongan na tinobus ni Tuhanta. Ndang sadia lelengnari, salpuhononta ma taon 2016, jala jaloonta ma taon na imbaru, taon 2017 sibasa-basahonon ni Debata tu hita. Marragam do na masa di bagasan sataon bolon on. Marsorin-sorin do masa las ni roha dohot arsak ni roha pe. Itamauliatehon ma ganup na masa i, ala tongtong do HOT ASI NI ROHA NI DEBATA tu hita.
R : Puji ma Jahowa ale tondingku, jala nasa rohangku di bagasan mamuji goarNa na badia i. Puji ma Jahowa, ale tondingku, jala unang tung halupahon denggan ni basaNa sudena.
L : EBENEZER, RASIRASA NUAENG DI DONGANI TUHAN I DO HITA. Taendehon ma “Sangap di Jahowa”

R : (mangendehon BE. 581 : 1 + 3 “Sangap di Jahowa”)
1 Sangap di Jahowa na sun timbul i,
balga ni holongNa ndang tarasam i.
Dilehon anakNa na sasada i
manobus hita jolma pardosa i.
Ref: Puji ma Debata ale manisia,
las roham las roham somba ma Debata.
Dapothon Jahowa na sun timbul i
marhite AnakNa Tuhan Jesus i
—- jongjong—-
3. Balga situtu pambaenMi Debata,
tung so hasuhatan holong ni rohaM.
Tu jolma pardosa asi do rohaM
diungkap Ho dalan lao tu banuaM.
Ref: Puji ma Debata….d.u..

2. VOTUM / INTROITUS
L : Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano, Amen.
Jahowa do Sijaga ho, Jahowa do parlinggomanmu di lambung ni tanganmu siamun. Ndang tagamon doiton ni mata ni ari ho arian, manang bulan pe bornginna i. Sai jagaon ni Jahowa do ho sian nasa parmaraan, sai jagaonna do tondim. Sai jagaon ni Jahowa do ho laho ruar dohot laho bongot, olat ni on ro di salelenglelengna. Haleluya
R : (mangendehon) Haleluya…. Haleluya…..Haleluya.
L : Martangiang ma hita: Ale Tuhan Debata na so marmula na so marpansohotan, Debata na manongtong ro di salelenglelengna. Na so olo suda do angka taonMu, jala dang marparbolatan angka ariariM. Mauliate hudok hami tu adopanMu naung mandongani hami sahat tu ujung ni taon on. Didongani Ho do hami mangadopi ragam ni hasusaan. Di paserep Ho rohanami uju mamolus las ni roha. Dilehon Ho do angka na ringkot dingolunami. Taiti ma rohanami tongtong tu Ho, asa sai tu Ho hami ro pasahathon sude na di rohanami be. Sai dongani hami mangujungi taon on, jala sai pargogoi hami manjalo taon na imbaru, sipasahatonMu tu hami. Dibagasan GoarMu na badia i, jalo ma tangiang nami. Amen.
—– hundul —–
3. MARENDE BE. No. 758 : 3 “JAHOWA PANGURUPI”
1. Jahowa pandongani ni na porsea i
Ibana patuduhon nang sidalananmi
Asa marolopolop ho di ujungna i
Ibana do donganmu, nuaeng nang sogot pe

4. PATIK :
L : Tangihon hamu ma Patik ni Debata di parpunguan ujung taon on, ima na tarsurat di buku evangelium Markus 8 : 34 ” Laos dijou ma natorop i rap dohot siseanna, didok ma tu nasida: Nasa na giot mangihuthon Ahu, disoadahon ma dirina, dituhuk ma silang na tu ibana i, diihuthon ma Ahu.” Antong rap mangido gogo ma hita tu Debata laho mangulahon patikNa i
R : Ale Tuhan Debata, sai pargogoi ma hami mangulahon na hombar tu PatikMi, Amen
5. MARENDE BE. No. 695 : 2 “JESUS TUHANKU DI HO MA AU ON”
2. Mansai godang do pardangolanki
Tagan so Jesus dope tohaphi
Disesa Jesus sude dosangki
Gok dame rohangki (jongjong)
Asi rohaNa di au, tongtong asi rohaNa di au
Disesa Jesus sude dosangki
Gok dame rohangki.

6. MANOPOTI DOSA:
L : Tatopoti ma dosanta, martangiang ma hita.
Ale Tuhan Debata, Amanami, Pargogo na so hatudosan. Na ro do hami tu joloM manganggukhon dosanami na godang i. Mansai jotjot do huarsahi hami Ho marhite pingkiran, hata nang pambahenannami na roa i.
R : Ale Tuhan, asi ma rohaM di hami, halak pardosa godang on.
L : Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami. Nang dongannami, ndang huhaholongi hami doshon dirinami.
R : Ale Tuhan, sai ingot ma hami, ala ni asi ni rohaM na godang i.
L : Marsalpuan do angka ari, minggu dohot bulan di bagasan sataon on. Sai jumpang do pangalaho dohot parulaonnami na so ture, na so tangkas patuduhon parbue na denggan maradophon dongannami jolma songon na pinangidoM tu hami.
R : Ale Tuhan, asi ma rohaM di hami, sai pauli ma rohanami.
L : Ias situtu ma buri hami sian hajahatonnami, jala paias ma hami sian angka dosanami. Ai nunga huboto angka pangalaosionnami, jala sai tong do sonson dosanami di joloM. Dompak Ho sambing do hami mardosa, jala najat situtu do di matam na huulahon hami, asa tung bonar Ho di bagasan pandohanmu, jala pita di bagasan panguhummu.
R : (mangendehon BE.No. 686 : 2 “Ramun do au”)
2. Na ro do au tu joloMi, gale do au urupi au.
O Jesus ala mudarMi dison do au patau ma au.
L : Bagabaga ni Debata taringot tu hasesaan ni dosanta: “Songon on do Hata ni Jahowa:”Unang ho mabiar, ai Ahu do siluluhon ho; nunga pola hujou goarmu, Ahu nampuna ho. Hasangapon ma di Debata na di Ginjang
R : Amen
—-hundul—-

7. MARENDE BE. No. 769 : 1 “TU DEBATA DO PANGHIRIMONKI”
1. Tu Debata do panghirimonki,
Di tano laut nang awangawang i
Ibana do haposanki
Tongtong do diramoti langkangki.
Torop pe mara manahopi au
Debatangki do sumarihon au
Pos rohangki, sonang do au
Ibana do na mandongani au

8. EPISTEL :
L : Hata ni Debata turpuk di hita di parpunguan ujung taon on, ima na tarsurat di buku 1 Rajaraja 3 : 5 – 24 : Apala di Gibeon ma patar Jahowa tu si Salomo di bagasan nipina bornginna i, didok Debata ma: Pangido ma manang aha silehononku tu ho.
R : Dung i ninna si Salomo ma: Nunga dibahen Ho asi ni roha godang tu naposom, damang si Daud, hombar tu parangena di jolomi di bagasan hasintongan, hatigoran dohot habonaron ni roha maradophon ho, jala nunga dipahot Ho di ibana asi ni roha na godangon, dilehon Ho di ibana sada anak na juguk di atas habangsana, songon na masa nuaeng.
L : On pe, ale Jahowa, Debatangku, nunga dipabangkit Ho naposom gabe raja singkat ni damang raja Daud; alai bajar dope ahu, ndang huboto ruhut tu balian manang di bagasan huta.
R : Ia naposomon di tongatonga ni bangsom do, naung pinillitmi, bangso na bolon, na so taretong jala na so habilangan dibahen deakna.
L : Dibahen i, lehon ma tu naposomon roha na pantas laho manguhum bangsomi, asa huboto manirang na denggan sian na roa; ai tung ise ma na tuk manguhum bangsom na marmulia on?
R : Dung i lomo ma roha ni Jahowa, ala songon i pangidoan ni si Salomo.
L : Jadi ninna Debata ma tu ibana: Ala na songon i pangidoanmi, jala ndang dipangido ho ginjang ni umur, jala ndang dipangido ho hamoraon, jala ndang dipangido ho hosa ni angka musum, roha tahe pinangidom asa tumimbang uhum.
R : Ida ma, bahenonku ma hombar tu hatam. Ida ma! Lehononku ma tu ho roha na bisuk jala na pantas, asa unang adong tudoshon ho sian na robi angka naung salpu i, nang na tubu muse.
L : Angkup ni na so pinangidom pe, lehononku do tu ho, nang hamoraon, nang hamuliaon, asa unang adong tudoshon ho nanggo sahalak di tongatonga ni angka raja saleleng ho mangolu.
R : Dung i molo sai tong marparange ho di angka dalanku laho mangaradoti angka patikku dohot tonangku, songon parange ni amangmu si Daud, tumpahonku ho huhut sarimatua.
L : Jadi dung ngot si Salomo, ida ma, nipina do hapengani. Jadi dung sahat ibana tu Jerusalem, jongjong ma ibana di jolo ni poti parpadanan ni Jahowa, jala dipelehon angka pelean situtungon, dibahen huhut angka pelean hamauliateon, jala dilehon mangan saluhut naposona.
R : Uju i ro ma dua parompuan sibabijalang mangalualu tu rajai, laos jongjong di jolona.
L : Ninna parompuan na sada ma: Santabi, ale tuanku, ia ahu dohot parompuan on maringan di sada jabu, jadi mangintubu ahu di lambungna di jabu i.
R : Dung i patoluarihon dung mangintubu ahu, mangintubu huhut parompuan on; jala rap hami na dua, ndang adong halak na asing di jabu i, dungkon ni hami na dua.
L : Dung i mate ma anak ni parompuan on borngin i, ditipa ibana uju modom.
R : Jadi hehe ma ibana tonga borngin, dihindat ma anakku sian lambungku, uju modom naposom boruburu, jala dipeakkon ibana tu ampuanna, ia anakna na mate dipeakkon tu ampuanku.
L : Jadi dung hehe ahu manogotna i laho pasusuhon anakki, gabe ida ma, nunga mate ibana. Alai hupamanatmanat ma ibana manogotna i, gabe ida ma, ndada ibana anakku na hutubuhon i.
R : Alai ninna parompuan na sadanari ma: Ndang songon i, ai anakku do na mangolu i, jala anakmu do na mate. Alai ninna parjolo i ma: Ndada! Ai anakmu do na mate, jala anakku do na mangolu i. Songon i nasida marbada masialusan di jolo ni rajai.
L : Dung i ninna rajai ma: Sadaon mandok: On do anakku na mangolu i, jala anakmu do na mate. Alai sadaan mandok: Ndada, ai anakmu do na mate, jala anakku do na mangolu i.
R : Jadi ninna rajai ma: Antong boan hamu ma tu ahu sada podang. Jadi dung sahat podang i tu jolo ni rajai.
L : I ma sahatna. Martua do angka na tumangihon Hata ni Debata jala na umpeopsa,
R : Amen

9. MARENDE BE. No.536 : 1 + 2 “ DITANGIHON TUHAN I”
1. Ditangihon Tuhan i, Hata ni tangiang i
Tung na pos do rohangki. Puji Tuhan i

2. Dipasaut HataNa i, nasa bagabaga i
Ndang boi ganggu rohangki. Puji Tuhan i.

10. REFLEKSI UJUNG TAON
L : Molo manaili hita satongkin marnida ragam ni angka na masa, naung itabolus di bagasan sataon on, hatindanghononta ma, paboa Tangan ni Jahowa do hape na sai tongtong manogu-nogu hita.
R : Holan di Debata ma hasangapon dohot puji-pujian.
L : Marragam do na masa di tonga-tonga ni masyarakat dohot bangsonta di bagasan sataon on. Lam ragat angka siula hajahaton, lam otik idaon siula na denggan. Songon i nang media na so apala objektif be mamaritahon angka na masa, gabe olo patubu hagaoron di tonga-tonga ni masyarakat. Nang angka aparatur ni negara on dohot angka masyarakat pe, dang apala marsitutu idaon manghangoluhon revolusi mental naung disoarahon dohot naung di hangoluhon partogi ni negeratta.
R : Alai biar mida Jahowa do parmulaan ni hapistaran dohot habisuhon.
L : Songon i nang di ngolu parugamoon, martamba-tamba do pangalaho radikalisme agama, sian parugamo na sada tu parugamo na asing. Jongjong deba, parugamo na sada manghasogohon parugamo na asing. Debanari mandok, holan ugamona na sumintong sian ugamo na asing. Gabe lam ragat masa parsalisian, na paroahon donganna dohot ragam ni angka teror pe.
R : Ale Tuhan, suanhon tu rohanami, asa tongtong huhaholongi hami dongannami jala huhaholongi hami nang musunami.
L : Di na tongon mangarade diri hita mangadopi Pilkada DKI Jakarta, naeng ma tongtong hita jamot di ulaonta, denggan marsaor dohot tetangganta, atik pe marasing be pilihanta. Unang ma adong jumpang sian tonga-tonganta, na patubu paraloan nang parmusuon dompak halak. Tongtong ma hita dibagasan halambohon mangadopi angka donganta mangasahon holong na sian Tuhanta i.
R : Tongtong ma itajalo habisuhon dohot halambohon sian Tuhanta Debata, asa rap hita saluhutna manumpahi DKI Jakarta asa lam tu majuna.
L : Songon i ma nang parsorion na masa di tonga-tonga ni rumatanggatta be. Adong do i na marsitaonon ala ni hapogoson, adong na marsitaonon ala ni parianakhonon, marsitaonon ala so saurdot ama dohot ina di tonga ni bagasna.
Sai adong do tarbege pangalaho kekerasan na masa di tonga-tonga ni keluarga. Kekerasan na marsaripe, lumobi ma angka kekerasan na niadopan ni angka dakdanak.
Aha ma ulaning naeng masa tu hita, molo so Hata ni Debata ojahan ni rumatanggatta?
R : Pasunggulhon ma tu rohanami, padan naung huhatindanghon hami di joloM. Jala sai ajari ma hami manghaholongi sude pangisi ni bagasnami be.
L : Mauliate ma di Tuhanta, ala ditotophon induk ni Hurianta do taon 2017 na ro, marojahan tu “Pendidikan dohot Pemberdayaan” laho pahitsathon hinaringkot ni perbinotoan nang angka keterampilan ni sude ruas dohot Parhalado, asa manahan mangadopi tantangan ni hamajuon ni tehnologi dohot media sosial na boi mangaliluhon haporseaonta. Ojahan ni tahun Pendidikan dohot Pemberdayaan on ima sian 2 Timotius 3 : 16 – 17 :
R : Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran, asa rimpas halak ni Debata, hobas tu nasa ulaon na denggan. Amen.

11. MARENDE BE. NO 763 : 1 “MOLO JESUS DONGANMI”
1. Molo Jesus donganmi las roham,
Jesus i pangurupim las roham.
Hot haporseaonmi dohot pos ni rohami,
saleleng di ngolumi las roham.
Ref:
Las roham, las roham, mardonganhon Jesus i las roham. Marsinondang ma di ho bintang panghirimon i
mardonganhon Jesus i las roham
—–jongjong—–

12. MANGHATINDANGHON HAPORSEAON:
L : Tahatindanghon ma haporseaonta i, songon na hinatindanghon ni donganta sahaporseaon di sandok portibi on, rap ma hita mandok :
R : Ahu porsea di Debata Jahowa….…..Amen
—–hundul —–
13. KOOR :

14. MARENDE BE. 14: 2 “PUJI HAMU JAHOWA TUTU”
BL. 57
2. Ingot tongtong ale tondingkon
Sude na denggan na dipasonggop Debata tu Ho;
Denggan basaNa do napangoluhon ho.

15. PASAHAT POKOK-POKOK PENTING BARITA JUJUR TAON DOHOT LAPORAN PARHEPENGON (denggan ma adong tercetak, unang pola dijaha sude)

16. MARENDE BE. No. 557 : 1 “DAO DUMENGGAN ”
1. Dao dumenggan asi ni rohaM
Dao ummarga sian ngolungkon
Sai pujionku ma Ho Tuhanku
Dao ummarga asi ni rohaM

17. MANDOK HATA dohot MARTANGIANG
a) Mandok Hata sahalak mewakili sude Ruas/Parhalado
b) Martangiang sahalak mewakili Parhalado

18. MARENDE BE. 806 : 1…. “AHA PE MASA DI NGOLU”
(Pelean Ia, Ib)
1. Aha pe masa dingolumon Tuhan manjaga ho,
HolongNa do mangondihon ho Tuhan manjaga ho.
Reff : Tuhan manjaga ho las pe roham marsakpe ho,
Sai diramoti ho Tuhan manjaga ho.
—-organ —-
2. Sai disarihon do ngolumi, Tuhan manjaga ho.
Sai ditangihon tangiangmi, Tuhan manjaga ho. Reff
—-organ —-
3. Molo borat siporsanonmi, Tuhan manjaga ho,
Tung pe golap parnidaanmi, Tuhan manjaga ho. Reff

19. JAMITA : JOHANNES 8 : 12 – 19

20. MARENDE BE. No. 720 : 1…. “NAENG MARSINONDANG NGOLUNGKU”
(Pelean II tu Dana Pensiun HKBP)
1. Naeng marsinondang ngolungku diigil Jesus i
Manang didia pe ahu tongtong huingot i
Reff : Tiur marsinondang ido niigil ni Jesus
Tongtong marsainondang, panondang do au tutu
—– organ —–
2. Ingkon hobas mangurupi, angka na gale i
Jala burju manghobasi songon Tuhanta i. Reff
—– organ —–
3. Tuhan urupi ma ahu sai jaga rohangki
Asa marsinondang ahu, Ho naeng tiruonki. Reff
—– organ —–
4. Naeng oloanku Tuhanku, saleleng ngolungki
Sogot di Surgo endengku pasangap Tuhan i. Reff

21. TANGIANG PELEAN (Agenda HKBP)

SELAMAT MEMASUKI
TAHUN BARU 1 JANUARI 2017



Admin//GH Kr.Jati

Posted in Buku AcaraTagged ,