Acara ibadah minggu ulang tahun ke-52 23-oktober

 Acara ibadah minggu & ulang tahun gereja (Acara Ceremonial).

 Acara ibadah dengan iringan Musik Orkestra

18 Oktober 1964, (Ultah 52) : 

” Parturena Parmingguon “
HUT HKBP KRAMAT JATI KE – 52 (18 OKT 1964 – 18 OKT 2016)

Thema :
”Napaoru dirina, i do sipatimboon”
(Barang siapa merendahkan diri, ia akan ditinggikan)
Minggu XXII SETELAH TRINITATIS
23 OKTOBER 2016

Acara Prosesi :
Persiapan di Ruang Konsistori
Barisan Prosesi : Pendeta dan seluruh Majelis Gereja
Saat rombongan prosesi memasuki gereja, jemaat berdiri, dan pemain musik menyanyikan lagu “Arbab”

Joujou Tu Hahohomon
U : Huria hinaholongan ni Tuhanta Yesus Kristus, atas goar ni Parhalado ni hurianta, pinasahat ma tabe tu sude hamu: Asi ni roha ma di hamu, dohot dame na sian Debata Amanta dohot sian Jesus Kristus Tuhanta, ima na mangaramoti hita saluhutna! (Hundul ma ruas dohot sude Parhalado tu hundulanna)
Dibagasan sadarion tung tama do hita mandok mauliate tu Debata, disaluhut pandonganion dohot pangaramotionNa di pardalan ni hurianta. Di ari 18 Oktober na salpu, gok ma umur ni hurianta HKBP Kramat Jati on 52 taon! Saluhutna i tung asi ni roha ni Debata do i tu hita. Alani i, tapuji ma Tuhanta jala tasomba ma Ibana, taendehon ma BE No. 581 “Sangap di Jahowa”

R : (Mangendehon BE 581: 1 “Sangap di Jahowa”)
Sangap di Jahowa na sun timbul i, balga ni holongNa ndang tarasam i. Dilehon AnakNa na sasada i, manobus hita jolma pardosa i.
Pujima Debata ale manisia, las roham, las roham somba ma Debata. Dapothon Jahowa na sun timbul i, marhite AnakNa Tuhan Jesus i

U : Tung so tarasam hita do balga ni holong ni roha ni Debata, dibagasan pardalan ni hurianta, jala tung so hasuhatan do denggan ni basaNa. Antong ta haholongi ma Debata sian nasa rohanta, sian nasa ateatenta dohot sian nasa pingkiranta. Robe ma hita tu adopanNa jala ta somba ma Ibana!

R : (Mangendehon BE 581: 2 “Sangap di Jahowa”)
Tung so hasuhatan do basaNa i, marhite AnakNa ni lehonNa i
MudarNa durus do di hau silang i, rara pe dosanta ias di baen i
Pujima Debata ale manisia, las roham, las roham somba ma Debata
Dapothon Jahowa na sun timbul i, marhite AnakNa Tuhan Jesus i

U : Pillit ma sadarion, manang na ise do sioloanmu: hagogoon portibion do manang Debata si lehon hangoluan ? Pillit ma sadarion manang na ise si sombaonmu: debata sileban do manang Debata sitompa langit dohot tano ?

R : Alai anggo au dohot donganhu sajabu, Debata do sioloan dohot sisombaon nami.
Jongjong – – –

S : (Mangendehon BE 581: 3 “Sangap di Jahowa”)
Balga situtu pambaenMi Debata, tung so hasuhatan holong ni rohaM
Tu jolma pardosa asi do rohaM, di ungkap, Ho dalan lao tu banuaM
Pujima Debata ale manisia, las roham, las roham somba ma Debata
Dapothon Jahowa na sun timbul i, marhite AnakNa Tuhan Jesus i

Votum – Introitus – Doa (U: Uluan; R: Ruas; B: Baoa; P: Parompuan)
U : Marhitehite goar ni Debata Ama dohot goar ni AnakNa Tuhan Yesus Kristus dohot Goar ni Tondi Parbadia na manompa langit dohot Tano. Amen. Martua do halak na manaon di pangunjunan, ai dung tau sian pangunjunan i, jaloonna do tumpal hangoluan, na pinarbagabaga ni Tuhan i tu halak na holong roha di Ibana. Haleluya!

R : (Mangendehon Haleluya, Haleluya, Haleluya!)

U : Martangiang ma hita: Ale Tuhan Debata, Pargogo na so hatudosan jala Pardengganbasa! Ro di saleleng ni leleng do asi ni rohaM. Mauliate ma rohanami tu Ho, ala diramoti Ho hami sian na sailaon sahat ro di sadarion. Hupuji hami ma Ho, ala naung sahat tu hami Barita na Uli na sian AnakMu, Tuhan Jesus Kristus, na pangolu hami. Mauliate hudok hami tu Ho, ala dibagasan dame dohot hasonangan dilehon Ho hataM na badai i. Sai asi ma rohaM, urupi ma hami mangulahon na nidokMu, asa hot rohanami jala tarparangehon hami parange na badia.

R : Tu Ho do hami pasahathon parsombaon nami, ala sian tingki tu tingki, lam tu hinsatna do huriaMon di panghobasionna. Ho do pajongjonghon jala na paojakhon huriaM marhitehite angka naposoM dohot ruas ni huriaM na olo pasahathon gogo, dohot pingkiran dohot sinadonganna, laho pauliulihon huriaMon.

B : Ditongos ho do angka Pandita laho mamaritahon barita nauli tu huriamon jala dilehon Ho do sada ni roha di sude ruasMu.

P : Didongani Ho do nang angka Parhalado laho marhalado di huriaMon. Jalo jala tangihon ma las ni roha ni huriaM sadari on.

U : Sai ajari jala paimbaru ma rohanami, asa lam ias hami ro di hasusuda ni bohalnami, marhitehite Tuhan Jesus Kristus Tuhannami. Amen. — Hundul —

Marende : BE 743 : 1 – 2 “O Tuhan Togu-Togu Ma Au”
O Tuhan togu-togu ma au, tu dalan lomo ni rohaMi
Raphon Ho sonang mardalan au, nang rahis maol sidalananki
TondiMi baen manggohi au on, margogoihon au naposoMon
Pasangap Ho di ngolungkon, paima sahat tu surgo au on
Baoa : Panghulingi ma au o Tuhan, na rade tumangihon hataM
Parompuan : Sai tumpahi ruasMu Tuhan, na uasan nuaeng di hataM
Baoa : Sai patau ma au on naposoM
Parompuan : Manjou halak na dao sian Ho
Sude : Ro di na so tumanda Ho, muba gabe pangoloi di Ho

Manjaha Patik & Refleksi Kilas Balik Sejarah HKBP Kramat Jati
U : Tabegema patik ni Debata tu hita dibagasan Minggu on, na nienet sian Evangelium Mateus 4: 17, songon on ma didok: “Jadi olat ni i mamungka ma Jesus marjamita; ia jamitana on do: Pauba hamu ma rohamuna, ai nunga songgop harajaon banua ginjang i

R : (Mangendehon BE. 763: 1 “Molo Jesus Donganmi”)
Molo Jesus donganmi las roham, Jesus i pangurupim las roham,
Hot haporseaonmi dohot pos ni rohami
Mardonganhon Jesus i las roham.
Reff: Las roham, las roham mardonganhon Jesus i las roham,
Marsinondang ma di ho, bintang pangkirimon i
Mardonganhon Jesus i las roham

U: Hamu ale bangsongKu, sai tangihon hamu ma poda-kon! Paeleng hamu ma pinggolmuna tu angka hata ni pamangankon. Bungkaonku ma pamanganku mandok umpama, manurasihon hulingkulingan sian na robi. Angka naung tabege jala na itaboto dohot na pinajojor ni angka ompunta tu hita. Ndang porsoonta tu anak nasida, tu sundutna singkat sogot; baritahononta do angka pujipujian ni Jahowa ro di hagogoonNa dohot halongangan, angka na binahenNa i. Ai nunga dipatindang Ibana sada panindangion di Jakkob, jala dibahen do sada patik di Israel, na tinonahonNa tu angka ompunta, asa dipabotohon nasida tu anaknasida i. Asa diboto sundutna singkat sogot, anak angka situbuhononhon dope; ia dung magodang nasida, asa dipaboa muse tu anak nasida. Asa dibahen nasida Debata haposan nasida i, jala unang dihalupahon angka pambahenan ni Debata, jala dijujur angka patikNa i.

R : (Mangendehon BE. 763: 2 “Molo Jesus Donganmi”)
Molo Jesus donganmi las roham, jagaonNa tondimi las roham,
Tiruonmu ma tongtong dame nang holongNa i,
Saleleng di ngolumi las roham
Reff: Las roham, …d.u..
U : Di tanggal 18 Oktober 2016, gok ma umur ni hurianta HKBP Kramat Jati on 52 taon. Molo taingot jala tarimangrimangi saluhut pardalan ni huria on, mansai godang pasupasu ni Debata naung itajalo. Sian bagas parmingguon na marpindapinda sahat tu inganan na hot jala na uli. Sian na manompangnompang sahat tu inganan na dasip. Saluhutna i, pasupasu ni Debata do i tu hita.

R : Sai baritahononku do angka denggan basa ni Jahowa, angka pujipujian di Jahowa, ai ido na tama marningot sude na binahen ni Jahowa tu hita, dohot ala ni godang ni denggan basaNa na binahenNa tu hita hombar tu angka asi ni rohaNa dohot tu godang ni denggan ni basaNa i.

U : Mauliate ma tapasahat tu Tuhan i, mansai godang do las ni roha jumpang di ngolu ni parhuriaonta. Di mulana i nunga tubu hasadaon di ngolu ni huria nang pe otik ruasna dohot parhaladona. Tapanghilalahon do usaho dohot semangat gotong royong ni sude ruas, sian na metmet sahat tu na magodang laho pauliulihon bagas ni huria i. Saluhutna i pasupasu ni Debata do i tu hita.

R : Molo taida di tingki on nunga tung mangerbang hurianta HKBP Kramat Jati; lam torop ruasNa, suang songoni nang parhaladoNa; lam hottot parsaoran, suang songoni haburjuon ni sude ruas mamelehon dirina tu huria i. Mangerbang do panghobasion ni huria, sahat tu na pajongjong Bagas Huria hita, inganan ni angka pangulaNa marhalado di hurianta on.

U : Tahamauliatehon do nang panumpahion ni saluhut ruas ni HKBP Kramat Jati dohot angka donateur, di naung ro Mobil Diakonia ni Hurianta, songon patuduhon Hurianta on na mangaringkoti ulaon Sosial tu angka Ruas ni HuriaNa.

R : Sai anggiat ma tu joloan ni ari on lam tu singkopna panghobasion ni hurianta, anggiat lam marsangap goar ni Debata di sandok portibion lumobi di Kota Jakarta on. Dipargogoi Tuhan i ma hamu saluhut Parhalado nami laho patulushon sangap ni Debata marhite hurianta on.

U : Tahamauliatehon do tong denggan basa ni Debata na paloashon hita paulihon Bagas ni Hurianta, nangpe i nuaeng dibagasan proses/tahap pembangunan.

R : Sai dipatulus Tuhanta ma saluhut na sinangkapan ni Hurianta, boi pittor hatop jongjong Bagas ni Hurianta i. Dipargogoi Tuhan i ma hita saluhut Ruas ni HuriaNa, asa tung dibagasan hasadaon dohot ungkap ni roha mangalehon angka panumpahion tu Pembangunan i. Dipargogoi Tuhan i ma hamu saluhut Parhalado nami laho patulushon sangap ni Debata marhite hurianta on.

U : Antong taolophon ma denggan basa ni Jahowa na tu hita marhite na pasahat dagingta gabe pelean na mangolu, na badia, na nihalomohon ni Debata. Marsiadu ma hita patupahon angka na dumenggan i, asa jumpang di hita haimbaruon, lumobi haimbaruon ni roha laho patuluson harajaon Banua Ginjang di tongatonga ni Hurianta on. Rap ma mangido gogo hita!

S : Ale Tuhan Debata sai pargogo i ma hami mangulahon na hombar tu lomo ni rohaM. Amen.

Marende BE. 169 1 + 3 “Ho Sipangolu Au”
Ho Sipangolu au, sai topot ma au on! Sai unang mandao dao,
Ho sian rohangkon! Ro Sipangolu ro tibu, baen ma au anakMu tutu,
Dohot mudarMi buri au, ias songon hapas ma au.
Ias tutu, ias tutu, Dohot mudarmi buri au, ias songon hapas ma au. – -Jongjong- –
Togu ma rohangkon, sai taiti au tu Ho; Ai langkaMi tongtong,
naeng tiruonku do! Reff : Ro Sipangolu ro tibu, …d.u

Panopotion ni Dosa dohot Hasesaan ni Dosa
U : Huria ni Tuhanta, di bagasan unduk dohot serep ni roha, tatopoti ma dosanta tu Amanta Debata. Martangiang ma hita: Ale Tuhan Debata, Pargogo na so hatudosan jala Ama Parasiroha! Ndang lomo roham mida hamatean ni pardosa; mulak ma nia parjahat i tumadingkon dalanna, asa mangolu ibana, i do dipangido RohaM. Alani i umbahen dipangido hami; sai sundati ma torutoruM asa unang mangonai be tu hami. Sai sesa sude dosanami, asa mangolu hami dibagasan asi ni rohaM. Sai pargogoi ma hami, asa margogo hami, marhitehite Tuhan Jesus Kristus Tuhan nami!

SL : (Mangendehon) BE. No. 683 : 1 + 2 ”DiadopanMu Jesus”
Di adopanMu Jesus lea tutu do diringkon,
Dibaen godang ni dosangkon di adopanMu Jesus.
Di adopanMu Jesus marsomba au huhut tungki,
Lao manopoti dosangki diadopanMu Jesus.

Baoa : Jotjot do hami ndang manghaholongi Ho sian nasa roha nami, sian nasa ate-ate dohot pingkiran nami. Jotjotan holan gogo dohot pingkiran nami do hupangasahon hami di ngolunami. Ale Tuhan, asi ma roham di hami, sesa ma dosa nami!

Parompuan : Hami pe, jotjot do ndang huhaholongi hami angka dongan nami songon diri nami. Naeng do hami nian dihaholongi alai maol hami manghaholongi. Tung tama do hami hona rimasmu. Ale Tuhan, asi ma roham di hami sesa ma dosa nami!

Ama : Husulingkit hami ngolu nami, tung godang do dosa na huula hami. Tung lemba do hami mangulahon lomo ni rohaM di bagas nami be, dohot tu angka dongan nami. Jotjot lupa do hami manghaholongi pardihutanami be, dohot angka ianakkon nami ala ni angka kesibukan. Huparsinta hami do nian, asa lam maju angka gelleng nami, hape lupa do hami marpungu, mangajari dohot mamparrohahon keluarga nami be. Naeng do hami nian diparsangapi, alai bangkol do roha nami mamparsangapi . Naeng do hami nian diargai alai maol do hami mangargai pandapot ni dongan na marasing tu pingkiran nami. Lomo do nian roha nami marhobas di huriaM, alai bangkol do roha nami patuduhonsa. Ale Tuhan, asi ma rohaM di hami, sesa ma dosa nami!

Ina : Tung godang do dosa na huula hami; jotjot do ndang huulahon hami tanggung jawab nami songon ina soripada. Lupa do hami maniroi na ringkot di sinonduk nami. Holan lomo ni roha nami do hupajolo hami. Huparsinta hami do nian asa “rukun” jala maju angka ianakhon nami, hape lupa do hami manosoi nasida, marpungu, mangajari dohot mamparrohahon partondion nasida. Naeng do hami nian di puji alai gale do hami mamuji, naeng do hami di anju alai maol do hami manganju. Ale Tuhan, asi ma rohaM jala sesama dosa nami!

R : Jotjot do lupa hami martangiang tu Ho, gabe holang parsaoran nami tu Ho hinorhon ni angka parungkilon. Sipata gale do haporseaon nami, sai hira na so margogo mangadopi angka hamaolon dohot parsahiton. Sipata marungutungut do hami, ala jotjot maralo kenyataan tu roha nami.

SL : (Mangendehon) BE. 683: 3 ”DiadopanMu Jesus”
Di adopanMu Jesus tarsolsol bagi rohangkon,
Muba ma au tu jolo on di adopanMu Jesus.

Parhalado : Ale Tuhan, hami pe angka parhaladoM, godang do dosa na huulahon hami. Jotjot do ndang huulahon hami tohonan nami songon parhalado. Sipata lupa do hami di angka ulaon nami manghobasi ruas ni huriaM. Ale Tuhan, asi ma rohaM di hami jala sesa ma sude dosa nami!

S : Martangiang na hohom (Dipalu ma musik dohot ende sian Song Leader mangendehon Ende sian BE. No. 173: 1 + 4 “Sai Mulak”)

U : Huria ni Debata naung manopoti dosa, tatangihon ma hata bagabaga ni Debata taringot tu hasesaan ni dosanta: Ise be mangulahon angka na pinillit ni Debata? Debata do na mamintori. Ise do mandabu uhum hamagoan? Kristus Jesus do naung mate; alai ndada holan i, naung mulak mangolu do, jala di siamun ni Debata do Ibana mangondihon hita! Hasangapon ma di Debata na diginjang!

R : Amen. … Hundul…

KOOR :
Marende BE. 697 : 1 + 4 “Molo Ho do Huihuthon”
Hupelehon ma diringku mangihuthon lomoMi,
Ndada be na olo salpu na manggohi rohangki.
Reff: Ho tongtong ihuthononku, Jesus na palua au.
Ho sambing do oloanhu ala nii martua au.

Na rade do au manaon, mangasahon padanMi,
Molo ho na manggogoihon talu haholomon i.
Reff,…d.u..

Manjaha Epistel : Psalmen 84: 1 – 7

KOOR :

Marende : BE . 501: 1 – 2 “Sai Ditogutogu Jesus”
Sai ditogutogu Jesus tondingki na gale i, Asa unang be au ganggu dipanoguonNa i, maradian do rohangku, Molo Huhaposi i nang sitaonon dipassonggop sai jonok do Tuhanki. Nang sitaonon di pasonggop, sai jonok do Tuhanki. – – -Jongjong- – –

Sai diiringiring Jesus au na gale situtu.Ditungkoli do langkangku, diparmudu au burju. Molo loja au mardalan, nang maheu tondingki :,: LehononNa aek na tio sian batu mamak i :,:

Manghatindanghon Haporseaon:

KOOR:

Warta:

KOOR:

Marende BE. 417 : 1 …….“ Rade Situtu Haluaon”
(Papungu Pelean Ia + Ib)
Sude : Rade situtu haluaon nanaeng tangkuponmu antong.
Rade nang di ho hatuaon, sihalashononmu tongtong.
Bernit do ditaon Tuhanmu, pasaehon dosam sasude.
Tung unang paujat Ibana. Sai jangkon pangkophopNa i.
—- Musik —
Ama : Patedek sude hahurangan topoti sandok dosami.
Pangido sai sesa O Tuhan, sude pangalaosionki.

Ina : Datdati sai saut botoonmu naung sesa dosam sasude.
Mardame dagingmu nang tondi maniop tongtong Tuhan i.
—- Musik —-

Sude : PangkophopNai parangehon pasangap Tuhanmu antong.
Ibana buas mangalehon tu ho hasonangan tongtong.
Sandok sian jea malua nang sian biarmu sude.
Sonang na ma ho na martua. Manghirim tongtong surgo i.
—-Musik —

Jamita : Lukas 18 : 9 – 14 (KOTBAH)
Marende BE No. 695: 1 – – “Jesus Tuhanku di Ho ma Au on”
(Papungu Pelean II dohot Amplop Ulang Tahun tu jolo)
Sude: Jesus Tuhanku di Ho ma au on, Asa mangihut tu Ho au tongtong.

Gohi rohangku ingani au on. Sonang si Ho tongtong,
O Tuhan togu ma au. O Tuhan togu togu ma au,
Gohi rohangku ingani au on, Sonang di Ho tongtong.
—- Musik —

Ama: Mansai godang do pardangolanki, Tagan so Jesus dope tohaphi.
Disesa Jesus sude dosangki, gok dame rohangki,
Asi rohaNa di au Tongtong asi rohaNa di au.
Disesa Jesus sude dosangki, gok dame rohangki.
—- Musik —
Ina: Nang pe mangonggop sibolis di au, Jala magigi musungki di au,
Ndada mabiar au pos rohangki Ho pangondianki,
Jesus pangondianki. Jesus Tuhan pangondianki,
Ndada mabiar au, pos rohangki, Ho pangondianki.
—- Musik —
SL: Na marhaposan tu Jesus tahe sai na martua ibana muse,
Sonang ibana diportibion, nang di surgo inon,
Jolma na bonar burju. Jolma na bonar huhut burju,
Sonang ibana di portibion, nang di surgo inon.

Tangiang Panutup – Pelean – Ale Amanami – Pasu-pasu :
Acara Ulang Tahun ( Di Minggu Arian).
Pimpinan HKBP Kramat Jati/Keluarga,
Seluruh Pendeta/Keluarga, serta
Seluruh Majelis Gereja/Keluarga HKBP Krmata Jati, mengucapkan :

”Selamat Ulang Tahun Ke – 52 bagi kita semua!”

 

hkbp krjati
hkbp krjati
Posted in Acara dan Kegiatan, Ulang taun gerejaTagged , ,