Partangiangan Pembuka Tahun 2020

IBADAH PARTANGIANGAN PAMUHAI HKBP KRAMATJATI TAHUN 2020

PARTANGIANGAN PAMUHAI
HKBP KRAMAT JATI

#parta #hkbpkramatjati


Topik Partangiangan Tahun 2020: “Sintong Mangaradoti Patik ni Debata”
Kamis, 13 Pebruari 2020


JOUJOU TU PARSAORAN DOHOT DEBATA

L : Horas ma di hita saluhutna! Pinuji ma Debata, Ama ni Tuhanta Jesus Kristus, na tongtong mangaramoti pardalanan ni ngolunta. On ma partangiangan pamuhai di Hurianta HKBP Kramatjati taon 2020 on. Tapangido ma pandonganion ni Debata asa Ibana anggiat tongtong di pargogoi hita di ganup pardalanan ni ngolunta, suang songon i nang pardalanan ni huriaNa.

H : Pinuji ma Tuhan Debata, tung na sumurung do asi ni rohaNa di hita nang di huriaNa.

L : Nunga tadai denggan basa ni Debata sian tingki na salpu sahat tu tingki on. Dipabongot Debata do hita tu taon 2020 on di bagasan las ni roha. Godang ma tongon na binahen ni Jahowa tu hita, jala ragam dope silehonon ni Debata tu hita nang tu huriaNa, lumobi ma asa dilehon togu ni roha dohot gogo di hita mangulahon angka ulaon siganup ari songon i nang ulaon panghobasion di huria I, anggiat saluhut ruasNa gabe sitindangi Kristus di ngoluna be. Nuaeng bongot ma hita tu partangiangan ta, taboto do, dang tarula hita agia aha molo so Debata na mandongani dohot na margogoihon hita. Alani tapaunduk jala tapaserep ma rohanta. Martangiang ma hita di bagasan rohanta be…
(Martangiang na hohom di bagasan rohana be… musik angon angon …. )
Songon pangaramotion ni Debata tu bangso Israel, songon i do nang pangaramotion ni Debata tu huriaNa, Tahangoluhon ma hata ni Debata na mandok: “Ai ingkon di bagasan las ni roha hamu borhat, jala di bagasan hadameon hamu pataruon.” Antong tapuji ma Debata naung mangalehon asi ni roha dohot denggan basaNa. Ibana do na manjaga huhut marmahani hita Marende ma hita sian BE 188 : 1,3 “Jahowa Siparmahan au”.

Marende BE 188 : 1, 2
“Jahowa Siparmahan au”

1. Jahowa siparmahan au dang hurang manang aha, Ai nasa jea dipadao do sian dorbiana, tongon dibaen na lomak i Lao pangoluhon tondingki, dibaen asi rohaNa (Jongjong)

2. Ditogu au tu na tio aek mata hangoluan, dibaen do tondingki sio di dalan hasonangan sabam rohangku do tongtong saleleng au di tano on baen sangap di goarNa.

VOTUM – INTROITUS – TANGIANG

L : Marhitehite goar ni Debata Ama dohot goar ni AnakNa Tuhan Jesus Kristus dohot goar ni Tondi Porbadia na tumompa langit dohot tano on. Amen! Jahowa Siparmahan ahu, ndang tagamon hurangan ahu.

H : Dipatongon do ahu tu jampalan angka na lomak, ditogutogu do ahu di lambung aek hasonangan. Dipasabam do rohangku, ditogu do ahu di dalan hatigoran, ala ni goarNa i.

L : Ai nang pe mardalan ahu di rura linggoman ni hamatean, ndang huhabiari parmaraan, ai Ho do mandongani ahu, tungkotMu dohot batahiM mangapuli ahu.

H : Ho do manutup meja di jolongku maradophon angka musungku, dimiahi Ho do ulungku, suksuk do panginumanki. Tongon tahe denggan basa dohot asi ni roha mangihutihut ahu saleleng ahu mangolu, jala dung mulak ahu masuhanku ma bagas ni Jahowa salelenglelengna.

L : Martangiang ma hita: Ale Tuhan Debata, na so marmula na so marpansohotan, Debata na manontong ro di saleleng ni lelengna! Nang pe marsalpuan angka ariarinami, alai ndang salpu ianggo asi ni rohaM. Dibahen i hupuji hami ma Ho marhitehite Tuhan Jesus Kristus Tuhannami, Nunga hujalo hami denggan ni basaM manipat taon na salpu i, jala huingot hami do i sadari on. On pe mauliate ni rohanami tu Ho, ala dipangolu jala diramoti Ho hami; dilehon Ho sipanganon dohot paruloson jala dipasupasu Ho na niula ni tangannami.. Patuduhon ma tu hami dalan sidalanannami. Hu hirim hami do pasupasuM marhite angka ulaon na denggan na huula hami. Alai na gumodang, pasupasuhon ma hataM na badia i tu rohanami, asa gabe imbaru rohanami, Marhitehite AnakMu Tuhan Jesus Kristus, Tuhannami. Amen. (hundul).

KOOR : a. b.

MARENDE BE 504 : 1, 3 ”Di togu Tuhan Jesus au”
1. Ditogu Tuhan Jesus au, i do na mangapuli au.
Diganup dalan nang tung maol, tanganna do tongtong huhaol, Ditogu togu Jesus au, tanganna sai maniop au,
Tongtong ma siseanna au, paima boi tu surgo lao.
3. Gomos ditiop tanganki, sotung na silap langkangki.
Di nasa parsorionki, Ibana haporusanki.
Ditogutogu Jesus au, tanganna sai maniop au,
Tongtong ma siseanna au, paima boi tu surgo lao.

MANGIDO HAGOGOON SIAN DEBATA

L : Hata ni Debata mandok: “Ndang tarulahon hamu agia aha ango so mardongan Ahu…… Hamu angka dongan, ganjang dope sidalananta, godang dope na ingkon siulahononta ditongatonga ni huria, keluarga nang masyarakat pe. Di totophon hurianta do taon 2020 on gabe taon pekabaran injil. Alani naeng ma tongtong marsaringar barita nauli di bagasta be, jala tarjou hita gabe siboan barita nauli tu na humaliang. Alani dang tarulahon hita saluhutna anggo so Debata margogoihon hita. Antong tu Debata ma hita joujou, asa Ibana patauhon dohot mangaramoti hita.

H :
(Mangendehon BE 512 : 1 “Di dalani Jesus tano”)
Di dalani Jesus tani dohot laut, tahi holong ni rohana di pasaut, na mura luhut di baen tondina i, dung di sesa utang ni dosanta i. Hahaanggi ro hamu sude, ta arahon ma donganta be, hahah anggi dao nang jonok be hara tu jolona dongan mu sude.

L : Marnida angka na masa di na humaliang, boi do ro ganggu ni roha. Alani ingkon ta haporseai do: Hata ni Debata tuk do i mangumpat biar sian rohanta be. Alani ta hangoluhon ma hata ni Debata. Jala ta loas ma bagasta be inganan parsaoran na mansai uli na marojahan tu hata ni Debata.
H :
(Mangendehon BE 512 : 2
“Di dalani Jesus tano”
Nunga monang di jabum hatana i, hata i di pangke ho sinjatami, ido hapistaran na sumurung i, jumpang do mura sudena baenon ni. Hahaanggi ro hamu sude, ta arahon ma donganta be, hahah anggi dao nang jonok be hara tu jolona dongan mu sude.

L : Unang ho mabiar, ninna Tuhan Jahowa, ai Ahu do siluluhon ho; nunga pola Hujou goarmu, Ahu nampuna ho. Ganggu roham mida angka namasa? Ganggu roham mangida angka pangunjunan? Moru gogom alani angka parungkilon? Ingot ma Ai molo dibolus ho aek, donganmu do Ahu, Tung sura pe mardalan ho di bagasan api, ndang mosokkononna ho, Sai bereng ma dompak Jesus i, ganda do hiras ni rihaM bahenon ni i.

H :
(mangendehon) BE 512 : 4 “Di dalani Jesus tano ”
Ganggu roha mida pangunjunan i, moru pe gogonta lao marungkil i, sai tabereng dompak Jesus Tuhan i, ganda hiras ni rohanta baenon ni. Hahaanggi ro hamu sude, ta arahon ma donganta be, hahah anggi dao nang jonok be hara tu jolona dongan mu sude.

L : Dipasahat Tuhan i do tu hita laho manghaholongi donganta jolma. Di suruh Tuhan i do asa radotanta angka na marungkil, na so mardihadiha, angka na pogos, na gale, angka dakdanak na sopot so mar ama so mar ina asa dumenggan ngolunasida. Taingot ma di na taparateatehon i nasida bagian ni na marbarita na uli do hita disi.

H : Sai patubu ma roha na masihaholongan di bagasan roha nami, asa dibagasan sada ni roha sude keluarga ruas ni huriaM. Asa dibagasan sada ni roha parhalado dohot ruas ni huriaM manghobasi angka ulaon na denggan di HuriaMon. Sai tubu ma roha na masihaholongan, marsiurupan, jala marsitangiangan di hami saluhutna.

L : Antong martua ma halak na marhaposan tu Jahowa, jala Jahowa haporusanna dibahen. Tudos do ibana tu hau na sinuan di topi ni batang aek, jala manjarar uratna di lambung batang aek, ndang mabiar ibana molo ro hamohopon, jala tongtong rata bulungna, jala ndang holsoan ibana di taon haraharon, jala ndang mansohot marparbue. Debata ma mamsu masu hita saluhutna. Amen.

KOOR :

MARENDE BE 743 : 1, 2
“O TUHAN TOGUTOGU MA”

1. O, Tuhan togutogu ma au, tu dalan lomo ni rohaMi,
Raphon Ho sonang mardalan au, nang rahis maol sidalananki, TondiMi baen manggohi au on, margogoihon au naposoMon, Pasangap Ho dingolungkon, paima sahat tu surgo au on.

2. Pangkulingi ma au o Tuhan, na rade tumangihon hataM,
Sai tumpahi ruasMu Tuhan, na uasan nuaeng di hataM,
Sai patau ma au on naposoM, manjou halak na dao sian Ho,
Ro di na so tumanda Ho, muba gabe pangoloi di Ho.

EPISTEL
Markus 7:1-8

L : Tajaha marsingkat soring turpuk epitel di partangiangan bodarion, na di enet sian Markus 7:1-8, songon ma hatana: Dung i rap marpungu ma tu jolona angka Parise dohot deba sian angka sibotosurat, naung ro sian huta Jerusalem.

: Jadi diida nasida ma deba sian angka siseanna, na jorjor mangan roti, so jolo marburi.
L : Ai anggo halak Parise nang nasa Jahudi, ndang olo mangan, ia so jumolo tangkas diusa tanganna mangihuthon adat ni angka situatua.
H : Na sian onan pe, ndang dipangan, so jolo diuras, jala godang dope na asing ditiop siradotan, songon pamurion di angka panginuman, gendi dohot hudon.
L : Jadi disungkun angka Parise dohot angka sibotosurat ma Ibana: Boasa so diihuthon angka siseanmi adat ni angka situatua, ai ramun do tanganna mangan roti?

H : Alai ninna Ibana ma mandok nasida: Sintong do dapot di hamu pangansi na sinurirangkon ni si Jesaya, songon na tarsurat i: “Dipapujipuji pamangan ni bangso on do Ahu; alai ia rohanasida dao do sian Ahu!”

L : Jala magopo do pambahennasida pasangaphon Ahu, ai patikpatik ni jolma do dipodahon nasida.”
H : Ai tading do patik ni Debata dibahen hamu, laho mangaradoti adat na sian jolma.
L : Martua ma na tumangihon hata ni Debata, jala na umpeopsa,
S : Amen

Koor: a. b.

TANGIANG PANGONDIANON

Koor: a. b.

MARENDE BE 232: 1-2
“Sian sude Parulian na arga”

1. Sian sude parulian na arga Sada huboto hutiop tongtong
Jesus Tuhanku Ho arta na arga Na mangatasi sudena antong
Tangkup Tuhanmu tung tiop hataNa Sai pangasahon ma bagabagaNa.

2. Naeng ho pistar ? Sai dapothon Tuhanmu Nasa na hurang sai boan tusi
Tu pamodaiNa paunduk rohaMu Asa tiur sasude bogasMi
Tangkup Tuhanmu tung tiop hataNa Sai pangasahon ma bagabagaNa.

JAMITA: 5 Musa (Ulangan) 30:15-20

MARENDE BE 720: 1-4
“Naeng marsinondang ngolungku”
(Papungu Pelean)

1. Naeng marsinondang ngolungku di igil Jesus i,
manang didia pe ahu tongtong huingot i.
Tiur marsinondang ido ni igil ni Jesus
Tongtong Marsinondang panondang do au tutu.

2. Ingkon hobas mangurupi, angka na gale i,
Jala burju manghobasi songon Tuhanta i.
Tiur marsinondang ido ni igil ni Jesus,
Tongtong Marsinondang panondang do au tutu

3. Tuhan urupi ma ahu, sai jaga rohangki,
asa marsinondang ahu, Ho naeng tiruonki.
Tiur marsinondang ido ni igil ni Jesus
Tongtong Marsinondang panondang do au tutu

4. Naeng oloanku Tuhanku, saleleng ngolungki,
Sogot di surgo I, endengku pasangap Tuhan i.
Tiur marsinondang ido ni igil ni Jesus
Tongtong Marsinondang panondang do au tutu

MARPARANGE NA IMBARU
Pdt : Hamu angka dongan naung mananda asi ni roha ni Debata, nunga tatangihon hata ni Debata. Antong, taparangehon ma tu joloan on lomo ni rohaNa, asa lam martamba pasupasu Natu hita. Solukkon ma jolma na imbaru, na tinompa suman tu Debata, di bagasan hatigoran dohot hapolinon na marhasintongan! Pos ma rohamuna di pangaramotion ni Debata. Alani dibagasan las ni roha ma hamu tumopot bagasmuna nang angka ulaon muna.

H :
(mangendehon) 754 : 1
“Gok Las Ni roha do au”

Gok las niroha do au di ngolungkon, di ngolukon di golukon,
goklas ni roha do au di ngolukon tongtong di roha kon. Mauliate gok las ni roha maringan holong mi Tuhan di au, Mauliate gok las ni roha maringan holongmi Tuuhan di au.

Pdt : Parhaseang hamu ma tingki, ai ari hasusaan do nuaeng. Antusi hamu ma, manang dia lomo ni roha ni Tuhan i. Ulahon ma ulaonmu denggan, pos ma roham, Debata do donganmu saleleng ni lelengna. Gok do holongNa di bagasan ngolum.

H :
(mangendehon: BE 754 : 3
“Gok Las Ni roha do au”

Gok do holong ni Jesus di ngolungkon, di ngolungkon, dingolungkon, Gok do holong ni Jesus di ngolungkon , tongtong do rohangkon.
Mauliate gok las ni roha maringan holong mi Tuhan di au, Mauliate gok las ni roha maringan holongmi Tuuhan di au.

Pdt : Didok Tuhanta Jesus Kristus: Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue, jala asa mian parbuemuna i; asa dilehon tu hamu nasa sipangidoonmuna sian Ama i marhitehite Goarhu. Dibagasan pos niroha tu Debata ta ulahon ma ulaonta, Sai na dongananNa do hita rasi rasa ro ajal ni hasiangan on.

TANGIANG PANUTUP – ALE AMANAMI – AMEN