PARTANGIANGAN PASSION IV

ACARA PARTANGIANGAN PASSION IV

HKBP KRAMAT JATI  – Kamis, 18 April 2019

_____________________________________________________________________________________________________ 

Marende BE No 179 ayat 1,2, 3 Adong do sada mual BL 20   

Adong do sada mual i, di na mardosa i

Mansai denggan do mual i pasonang rohangki

Aek mual na badia i, ima di Jesus i.

Disesa do tihasta i, dibuat arsak i.

Ai mudar ni Tuhanta i Do mual i sintong

Durus di Golgata do i Mangkophop hita on.

  1. Votum – Tangiang

U  :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia. Amen

On do dipatupa Debata : Humophop hita, gabe dosa do Ibana na so tumanda dosa, asa gabe hatigoran ni Debata hita di bagasan Ibana

         Martangiang ma hita : Ale Amanami na di banua ginjang, parasiroha na sumurung di sude jolma! Ndang di olani Ho AnakMu na sasada i, dilehon Ho do Ibana humophop hami, mamorsan dosanami sahat tu hau pinarsilang i. Sai patogu ma rohanami manghaporsea i hasesaan ni dosanami, asa unang mandele hami ala ni dosanami, alai asa pos situtu rohanami di asi ni rohaM na godang i, marhitehite Tuhan Jesus Kristus Tuhannami, Anak haholongan ni rohaM. Amen.

  1. Marende BE No. 88 ; 2 – 3 Di surgo do alealenta  BL 106

Tarsolsolbagi do rohangku Paidaida dangolMi

Marningot sasude dosangku Ai i do na tinaonMi

Hupuji nasa asiMi Alai gumodang holongMi

Jotjotna i husoadahon Ho Sipangolu tondingkon

Mabiar lao mangkatindangkon Ho na mangkophop au tongon

Hupuji nasa asiMi Alai gumodang holongMi.

U  :  Asa ditogihon nasida ma Jesus sian jolo ni si Kayafas tu kantor. Alai sogot manogot i. Ndang na bongot nasida tu kantor asa unang tarsubang nasida laho manganhon Paska i. Gabe ruar ma si Latus mandapothon nasida, didok ma : Pangaluan dia do diboan hamu dompak Halak on? Dungi ninna nasida ma mangalusi; Aut unang sibahen na jahat Halak on, ndang tagamon pasahatonnami Ibana tu ho.

R  :  Gabe ninna si Latus ma mandok nasida: Boan hamu ma Ibana, uhum hamu ma Ibana marguru tu adatmuna

U  : Alai ninna angka Jahudi ma mandok ibana: Ndang jadi pusaonnami manang ise. Jadi dialuhon nasida ma Ibana ninna ma: Na dapot hami do On pabalikbalikhon bangsonami jala mangorai hami mangalehon guguan tu kesar i. Dipandok ; Raja, Kristus do Ibana. Jadi dibongoti si Latus ma muse kantorna, dijou ma Jesus, didok ma tu Ibana: Atehe, Ho do Raja  ni Jahudi? Ro ma alus ni Jesus :

R  : Na sian roham do na nidokmi, manang na didok halak do i tu ho taringot tu Ahu?

U  :  Gabe dialusi si Latus ma: Ai halak Jahudi do ahu, bangsomi dohot angka sintua ni malim do pasahathon Ho tu ahu, aha na binahenMu?

R  :  Gabe dialusi Jesus ma : Ndang sian portibi on harajaonKu

U   :  Dung i ninna si Latus ma: Asa Raja do Ho? Jadi ninna Jesus ma

R   :  Songon na nidokmi ma tutu, Raja do Ahu, umbahen na tubu Ahu jala umbahen na ro Ahu tu portibi on, asa Huhatindanghon hasintongan i. Ganup na sian hasintongan i, tangihonon ni i do soarangKu

U   :  Jadi ninna si Latus ma: Aha do hasintongan i? Jadi dung didok songon i, ruar ma muse ibana manopot angka Jahudi mandok tu nasida: Ndang jumpang ahu manang aha salaNa

  1. Koor :
  2. Marende BE No. 81 ; 1 Aha ma endehononhu      Bl  185

Jesus mual ni ngolungku, Sipangolu tondingki

Ai dibunu Ho musungku, i ma hamatean i

Ho manaoni hamagoan, patupahon hangoluan

Ala ni hupuji Ho tung marribu hali do

U  :  Alai lam digogohon nasida ma mandok: Digunturi Ibana do bangso i, ai mangajari do Ibana di sandok tano Judea mamungka sian Galilea sahat ro tuson. Alai umbege i si Latus, manungkun ma ibana manang na halak Galilea Jesus. Jala dung diboto na sian gomgoman ni si Herodes Ibana, disuru ma Ibana tu jolo ni si Herodes, ai tongon do ibana di huta Jerusalem uju i.

R   : Marnida Jesus si Herodes, las situtu ma rohana, ai nunga nania lelengna, sai naeng idaonna tanda sian Ibana sipatupaonNa

U  :  Jadi godanggodang ma disungkunhon tu Ibana, alai ndang dialusi Jesus ibana. Ia si Herodes rap dohot donganna direherehe i jala dilea i do Ibana. Disolukhon ma pahean na arga tu Ibana, laos songon i ma disuru Ibana mulak tu si Latus

R   :  Jadi di na sadari i ma maraleale si Herodes dohot si Latus, ai na masihosoman do nasida anggo na sailaon

  1. Koor :
  1. Marende BE No. 76 ; 4 Sada nama sangkap     Bl  199

Gok di Ho ma au ale Tuhanku, jala Ho ma jambarhi

Dok ma amen rongkom ma goarMu, tu bagasan rohangki

Lomo ni rohaM ma sungkunonhu, di sude na naeng ulahononhu

Olo i ma padanhi, tu Ho Jesus Tuhanki

U   : Alai peam do dipalua panguhum i di pesta i sada halak na tarhurung, marguru tu na tinodo ni natorop. Alai adong ma na tarhurung uju i sada parjahat na sumalin na margoar si Barabbas. Jadi di na pungu i nasida, didok si Latus ma tu nasida: Ise dipangido hamu paluaonku, si Barabbas manang Jesus na targoar Kristus do?

R  : Alai sai disosoi angka sintua ni malim dohot natorop i ma mandok palua on na si Barabbas

U   :  Dung i didok si Latus ma tu nasida: antong aha bahenonhu tu Jesus na targoar Kristus? Gabe saluhut nasida mandok : Parsilangkon ma Ibana. Alai ninna panguhum i ma: Ai aha na jahat dibahen?

R   :  Jadi lam gogo ma nasida mandok : Parsilangkon ma!

  1. Koor :
  2. Marende BE No 77 ; 3 Hamu saluhut halak    Bl  65

Aha do manginona tu Ho silehon tua di hajolmaon i?

So dung hea marsala, Ho doshon hami jolma, Ndang dung dibaen Ho dosa i

U   : Dung i ditogihon si Latus ma Jesus didok ma linsingan. Jadi didandani soldadu ma sungsang duri bahen tumpal, diampehon ma i tu uluNa, baju dapdap ma dialithon tu dagingNa. Dung i ro ma nasida tu joloNa mandok : Tabi di Ho ale Raja ni Jahudi, laos dipastap. Dung i ruar ma muse si Latus, didok ma tu angka Jahudi

R  :  Ida hamu ma, hutogihon do Ibana tu jolomuna asa diboto hamu na so adong jumpang ahu salaNa

U   :  Laos ruar ma Jesus manjujung sungsang duri jala marbaju dapdap. Jadi didok si Latus ma tu nasida: Ida hamu ma Jolma i! Asa dung diida sintua ni malim dohot naposo Ibana, dijouhon ma : Parsilanghon, parsilanghon ma Ibana. Dung i didok si Latus ma tu nasida : Boan hamu ma Ibana, parsilanghon hamu, ai dang jumpang ahu salaNa. Gabe dialusi angka Jahudi ma ibana, ninna ma : Marguru tu patiknami, ingkon marutang hosa Ibana, ai dibahen do diriNa Anak ni Debata. Umbege i si Latus lam ganda ma biarna. Dung i diulahi muse tu kantorna, didok ma tu Jesus : Sian dia do Ho? Alai ndang dialusi Jesus ibana. Dung i didok si Latus ma tu Ibana: ndang angkupanMu ahu manghatai ? Ndang diboto Ho, marhuaso ahu paluahon Ho ? jala marhuaso parsilanghon Ho ?  Jadi dialusi Jesus ma: Ndang adong huasom mangago ahu, aut unang nilehon i tu ho sian ginjang. Dibahen i gumodang do dosa ni na pasahathon Ahu tu ho. Jadi olat ni i ma dilului si Latus dalan paluahon Ibana.

R  : Alai manjou-jou ma angka Jahudi,  ninna do : Molo dipalua ho on, ndang aleale ni Kesar ho ! Ai na mangalo Kesar i do na ganup na umbahen dirina gabe raja.

U  : Asa dung dibege si Latus hata i, ditogihon ma Jesus haruar, laos hundul ibana di habangsa paruhuman i na di inganan na margoar : Pantar Batu alai anggo di hata Heber: Gabbata. Ima na masa di ari parhobasan Paskah, mareak hos ni ari. Dung i didok ma tu angka Jahudi: Ida hamu ma Rajamuna !

R  : Alai digogo nasida ma manjouhon: padao, padao ma i ; parsilanghon ma Ibana !

U  :  Dung i didok si Latus ma tu nasida, parsilanghononhu ma Rajamuna ? jadi dialusi angka sintua ni malim ma:

R  : Ndang adong Rajanami dunghon ni Kesar i.

U  : Asa dung diida si Latus, na so marguna hatana, lam ganda tahe gaorna, dibuat ma aek mamuri tanganna di jolo ni natorop i huhut mandok : Lias do ahu sian mudar ni On! Hamu do na sari disi ! Dung i ninna sude natorop i ma !

R  :    Marsapata tu hami dohot tu ianakhonnami ma mudarNa i !

:   Dung i saut ma dipalua si Barrabas. Alai anggo Jesus dilinsingi, dung i dipasahat ma asa diparsilanghon.

 

  1. Marende BE No. 86 ; 1-2 Silang na badia i Bl   67

Silang na badia i Ho do lombulombungki

Maralohon dosa i Dohot pandelean i

Di sude sitaonon i Ho ma lombulombungki

Nasa na huula i Ndang tau hasonanganki

Nang ringkot pe rohangki Pola ro nang ilungki

Holan asi ni rohaM Pangurupi o, Tuhan

 

  1. Jamita :

 

  1. Marende BE No. 622 ; 1 -2

Mansai nalnal di angka partingkian, sinondang ni silangMu Tuhanki

Sian hatiuron na marsinondang, holongNa na so halompoan i

Sude na bangso do marpanghirimon, tu sondang ni asi ni roha i

Songon parluga na manghalungunhon, parbinsar ni mataniari i

SilangMu Kristus tanda ni holongMu, pahisar tondi na magopu i

Mangalononghon sasude dosangku, mabaor tu laut asi ni rohaMi

Naung tubu hami gabe na imbaru, na niurasan sian dosa i

Ala mudarMu na niusehonMu, di Golgata di hamamateMi

  1. Tangiang Panutup : Ale Amananami-Pasupasu-Amen.
Posted in parta, Passion