partangiangan 2 passion 2019

ACARA PARTANGIANGAN PASSION II

HKBP KRAMAT JATI

Selasa, 16 April 2019

_____________________________________________________________________________________________________ 

  1. Marende BE No 83 : 1-2 Na lao do birubiru i BL.214

Na lao do birubiru i, mamorsan angka dosa

Ni nasa hajolmaon i, di benget ni rohaNa

Diporsan do sahitta i, dilehon do diriNa i

Tu tangan ni pamunu, ditaoni do na bernit i

Ro di na tos hosaNa i, didok : Naeng porsanonHu

 

Ianggo birubiru i, ima alealengku

Na paluahon tondingki, disuru Debatangku

Didok mandok AnakNa i, sai topot ma pardosa i

Naung sun tinoruanKu, balga tutu do rimasHi

Alai tarbaen do mombun i, horhonon ni mudarMu

 

  1. Votum – Tangiang

U   :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia. Amen

Tagan jolma Kristus, dipelehon do angka pangidoanNa dohot elekelekNa, mardongan angguk bolon dohot iluilu tu na tuk paluahon Ibana sian hamatean. Jadi ditangihon do Ibana, gabe malua sian hatahuton i. Ai atik pe Anak Ibana, diguruhon do pangoloion marhite sian na tinaonNa i. Jadi dung rimpas, gabe sihorhon haluaon salelenglelengna do Ibana di sude na mangoloi Ibana.

         Martangiang ma hita : Ale Amanami parasihoha na sumurung, Debata  ni hatuaonnami!. Huingot hami do di angka ari on panaonon dohot hamamate ni Tuhan Jesus Kristus, Tuhannami. Pahibul ma rohanami jala parbadia i mamingkiri sude na tinaonNa i. Patandahon ma tu hami dosanami, asa diarsakhon rohanami, asa hupompomi hami hisaphisap dohot sangkapsangkap ni rohanami na roa i, jala asa hupasaut hami lomo ni roha ni na manobus hami, asa martua hami marhite sian i ro di saleleng ni lelengna. Sai patupa ma i di hami marhitehite Tuhan Jesus Kristus Anak haholongan ni rohaM. Amen.

  1. Marende BE No. 718 : 1 – 2 Hubege Jesus manjou  

Hubege Jesus manjou hubege Jesus manjou

Sipalua au manjou porsan silang ihuthon ma Au.

Sai ihuthononku Jesus sai ihuthononku Jesus,

Sai ihuthononku Jesus. Huihuthon Jesus Tuhanki.

Tu Getsemane au dohot, tu Getsemane au dohot,

Rap marungkil dohot Jesus, mangihuthon Jesus Tuhanki.

Sai ihuthononku Jesus sai ihuthononku Jesus,

Sai ihuthononku Jesus. Huihuthon Jesus Tuhanki.

 

U   : Dungi sahat ma Jesus rap dohot nasida tu sada porlak na margoar Getsemane. Jadi didok ma tu angka siseanNa i : Hundul ma hamu jolo dison saleleng disan Ahu martangiang. Dung i ditogihon ma si Petrus dohot anak ni si Sebedeus na dua i, dung i gabe marsak situtu ma Ibana jala bobonosan. Jadi didok ma tu nasida : Mansai marsak situtu do rohangKu, hira na mate do. Dison ma hamu dungo rap dohot Ahu. Dung i laho ma Ibana saotik tu jolo, dipatungkap ma bohiNa tu tano martangiang, ninna ma :

R   :  Ale Amang, namun na tabahen, salpuhon ma siinumon on sian ahu!. Alai tahe unang ma marguru tu rohangKu, rohaM do

U   : Dung i mulak ma Ibana tu angka siseanNa, jala tarpodom nasida didapot, jadi didok ma tu si Petrus : Ndang margogo hamu hape dungo rap dohot Ahu nanggo sangombas ?

R   :  Dungo ma hamu jala martangiang, asa unang hamu bongot tu pangunjunan, ai girgir do nian tondi i, alai gale do ia daging

 

  1. Koor : Parompuan
  2. Marende BE No.171 : 1, 2 Tanda i ma au BL.49

Tandai ma au, sungkapi ma dohot rohangku, uji ma au

Pamanat huhut ma dalanhu, olo ditanda Ho au Debata

Asi ma rohaM, taringot tu pangalahongku

Olo tutu, jotjot do na lilu dalanhu, sesa dosangku, sude Debata

U  :  Dung i laho ma Ibana paduahalihon martangiang, ninna ma : Ale Amang, molo so tarbahen salpu on, nda ingkon Huinum, sai saut ma lomo ni rohaM. Dung i di na ro i Ibana, tarpodom muse ma siseanNa i di dapot, ai mansai dokdok do salibon nasida. Jadi ditadinghon ma laho martangiang patoluhalihon mandok hata ondeng. Dung i didapothon ma muse angka siseanNa i, jadi didok ma tu nasida

R   : Datdatanmuna dope modom dohot maradian ?. Nunga dapot tingkina nuaeng, sahat ma Anak ni Debata tu tangan ni pardosa

U  :  Hehe ma hamu laho ma hita. Ndi, nunga ro na pasahathon Ahu

  1. Marende BE No.622 : 2 Mansai nalnal

SilangMu Kristus tanda ni holongMu pahisar tondi na magopu i

Mangalononghon sasude dosangku mabaor tu laut asi ni rohaMi.

Naung tubu hami gabe na imbaru, Na ni urasan sian dosa i

Ala mudarMu na ni usehonMu, di Golgota di hamamateMi.

 

U    :Alai diboto si Judas do inganan i, ai jotjot do marpungu Jesus tusi dohot angka siseanNa. Ia si Judas diarahon ma angka soldadu dohot angka naposo ni sintua ni malim, didapothon ma tusi mantat sulusulu, palito dohot sinjata. Diboto Jesus do saluhut na naeng songgop tu Ibana, jala ruar ma Ibana, didok ma tu nasida : Ise do jinalahanmu ?

R  : Gabe ninna nasida mangalusi : Jesus na sian Nazaret i do!.

U      :        Dung i ninna Jesus ma mandok nasida : Ahu do i !. Alai dohot do si Judas parjehe i jongjong di lambung nasida. Asa dung didok tu nasida : Ahu doi, sumurut ma nasida martinggangan tu tano. Dung i diulahi ma manungkun nasida : Ise do na ni luluanmuna ?. Jadi didok nasida ma :

R   : Jesus halak Nazaret i do!. Dung i ninna Jesus ma mangalusi nasida : Nunga hupaboa tu hamu : Ahu do i. Asa molo Ahu dilului hamu, loas ma laho angka on!

U  :  Ai naeng do jumpang na nidokNa i: Ndang adong na mago Hubahen agia sada sian angka na nilehonMi tu Ahu. Alai nunga dipabotohon parjehe i hian partinandaan tu nasida, ai didok do : Ia i na huumma, Ibana ma i, ima tangkup hamu. Asa pintor didapothon ma Jesus, didok ma : Tabi di Ho Guru!, laos diumma. Alai ninna Jesus ma mandok ibana : Marhua ho tuson anggia ?.

R  : O Judas, pangummaon do hape dibahen ho pasahathon Anak ni Jolma i. Dung i ro ma nasida, dilaluhon ma tangan nasida tu Jesus manangkup Ibana

 

  1. Koor : Ama Arbab

 

  1. Marende BE No 180 : 1, 3 Ro tu Jesus ho na loja BL. 228

 

Ro tu Jesus ho na loja, na maheu i. Lam lumbang do di lambungNa roham i.

 

Timbang holong ni rohaNa, na sai godang i. Ai dilehon do hosaNa, tobusmi

 

U   : Dung i adong ma sian angka sisean ni Jesus mangalaluhon tanganna, disintak ma podangna, ditampulhon ma tu naposo ni sintua ni malim sahalak, dipisikhon ma pinggolna. Jadi didok Jesus ma tu Ibana

R  :  Pasarung podangmi, ai na manintak podang, mago do bahenon ni podang!

U   :  Ai na so tarbahen Ahu do di roham mangido sian Damang, asa dipadiri di Ahu saonari lobi sian sampulu dua loksa surusuruan ?. Alai songon dia ma disi saut hata ni surat i na mandok : Ingkon masa do na songon i. Uju i ma didok Jesus tu angka natorop i

R :Hira na dompak panamun do hamu hehe, marpodang jala marlombutlombut manangkup Ahu

U   : Ariari do Ahu nian hundul mangajari di Bagas Joro, so adong ditangkup hamu Ahu. Alai na masa do sude on, asa jumpang hata ni angka panurirang i. Dung i ditadingkon saluhut sisean i ma Ibana laho maporus

 

  1. Koor : Lansia
  2. Marende BE No. 407 : 1- 2 Panotnoti ma silang BL.271

Panotnoti ma silang ni Tuhanta i namamorsan sude dosami,

Tinggangkon sude arsak ni rohami, Pasesahon sude dosami.

So, jo,bereng I ! Panot-noti ma silang ni Tuhanta I, ngolumi, ngolungki sian i.

 

Tung beasa ditaon Ho, Tuhan, songon i dibagasan sude burjuMi ?

Tung beasa sap mudar sude dagingMi ai tigor do sude dalanMi ?

Nda i holongMi ? MudarMi na use pasonangkon muse sasude na porsea disi.

 

  1. Jamita :
  2. Marende BE No. 88 : 1 – 4 Di surgo do alealenta BL.106 (P Pelean)

Jesusku naung manobus ahu sai naeng haholonganku Ho

Tu dolok Golgata Ho laho Nionjar ni holongMu do

Hupuji nasa asiMi Alai gumodang holongMi

 

Tarsolsolbagi do rohangku Paidaida dangolMi

Marningot sasude dosangku Ai i do na tinaonMi

Hupuji nasa asiMi Alai gumodang holongMi

 

Jotjotna i husoadahon Ho Sipangolu tondingkon

Mabiar lao mangkatindangkon Ho na mangkophop au tongon

Hupuji nasa asiMi Alai gumodang holongMi.

 

Bagas uhirhon tu rohangku PangkophopMi humophop au

Tusi ma togu pingkiranku Guru di Ho sambing ma ahu

Hupuji nasa asiMi Alai gumodang holongMi

 

  1. Tangiang Panutup : Ale Amananami-Pasupasu-Amen.