PARNINGOTAN DI HASASAOR NI TONDI PARBADIA BAHASA BATAK TOBA

PARTURE NI ACARA DI PARNINGOTAN DI HASASAOR NI TONDI PARBADIA BAHASA BATAK TOBA

 

Jamita : Rom 8:9-11

“HASASAOR NI TONDI PARBADIA / MEMPERINGATI HARI TURUNNYA ROH KUDUS” 

PARTURE NI ACARA PARNINGOTAN DI HASASAOR NI TONDI PARBADIA
Topik : TONDI PARBADIA NA PANGOLUHON  (Rom 8:9-11)

MINGGU, 9 Juni 2019,

Rangkaian Ibadah : BAHASA BATAK TOBA  

( : Klik untuk >> Bahasa Indonesia )


01. JOUJOU TU PARSAORAN (L: Liturgis; R: Ruas)
L : Selamat ari Pentakosta ma di hamu saluhutna! Ari parningotan na balga do ari on di sude Huria ni Tuhan i. Jongjong Huria di portibi alani Tondi Parbadia do na mangula manjou, papunguhon dohot pahothon parsaoran ni angka na porsea, ima na ginoaran Huria.

R : PINUJI MA TUHAN I NA MANGUSEHON TONDINA TU GANUP ANGKA NA PORSEA DI IBANA.

L : Ibana do na paluahon jala manjou hita marhitehite panjouon na badia. Tondi Parbadia i do na pangoluhon hita. Alani i ma dibagasan hiras ni roha, taolophon ma Ibana mardongan arbab nang sarune, jala nasa na marhosa ingkon mamuji Jahowa. Taendehon ma “ O Tondi Parbadia i bongoti”

R : (mangendehon) BE. No. 102:1-3 “O Tondi Parbadia i bongoti” BL 206
O Tondi Parbadia i bongoti rohanami be ro sipatiur roha. O sondang sian surgo i sondangi rohanami be tu halalas ni roha. Asa masa patupahon pinodahon ni hataMu sai tu hami ma rohaMu.

Ho do silehon roha i di nasa na porsea i tumpahi rohanami. Patogu rohanami be pasar hataM tu sasude sai tong dongani hami. On pe sude parrohaon hatuaon lehononMu sipujion do goarMu
– elekton/musik –
Sai pargogoi ma hami on mangihutihut hataMon di pardalanannami. Haporseaonnami pe tambai tung masa aha pe na bernit taononnami. Tatap, tatap sude hami rohanami pasonanghon hajolmaon hamonanghon.

02. VOTUM INTROITUS TANGIANG
L :Marhitehite goar ni Debata Ama, dohot goar ni anakNa Tuhan Jesus Kristus, dohot goar ni Tondi Parbadia, na tumompa langit dohot tano on, Amen. Songon on ninna Tuhan Jahowa: LehononKu tu hamu roha na imbaru dohot tondi na imbaru tubagasan ateatemuna, jala unsatonKu roha batu sian dagingmuna, jala lehononKu tu hamu roha na marpanghilalaan. Jala lehononKu TondingKu tubagasan ateatemuna, Ahu do mambahensa, asa marparange hamu dibagasan angka PatikHu, angka uhumHu pe radotanmuna jala patupaonmuna do. haleluya

R : (mangendehon) HALELUYA, HALELUYA, HALELUYA

L : Martangiang ma hita! Ale Tuhan Debata Amanami! Ho do manondangi jala mangajari roha ni angka na porsea di HataM marhitehite Tondi Parbadia. Sai buhai ma rohanami asa ture parrohaonnami marhitehite TondiM i, asa tongtong dame rohanami manghalashon hagogoonNa i marhitehite Tuhan Jesus Kristus Tuhannami, Amen. —hundul —

3. Marende BE.No.104:6-7 “Bongoti ma rohangku” BL. 155
Usehon tu rohangku holong ni rohaMi. Padenggan ma hatangku tu dongan sasude. Asi rohaM padao ma bada halatean. Patimbul hadameon na roa i padao

Baen gok haporseaon ma rohanami be. PanumpakMi gandahon tu artanami be. Pabali tondi i na olo manundati na olo mangarsahi rohaM na denggan i.

04. PATIK NI DEBATA:
L : Tangihon hamu ma patik ni Debata di Pesta Parningotan Hasasaor ni Tondi Parbadia sadari on, ima na tarsurat di Galatia 5:22 “Alai angka on do parbue ni Tondi: Holong dohot las ni roha, dame dohot lambas ni roha, habasaron, habasaon, haporseaon, halambohon, dohot hatomanon”. Antong rap mangido gogo ma hita tu Debata mangulahon patikNa

L+R : Ale Tuhan Debata, sai pargogoi ma hami mangulahon na hombar tu patikMi, Amen

05. Marende BE.No.465:3-4 “Pasupasu LehononMu” BL. 311
Bereng au ramun rohangku ndang tarbaen malua au. Holan Ho na boi mamuri ro palua dohot au. Dohot au dohot au ro palua dohot au.
—-jongjong —
Suru ma TondiM manggomgom hata nang ulaonki. Paimbaru ma rohangku topot au di asiMi. Dohot au, dohot au sai ditopot Ho nang au.

06. MANOPOTI DOSA
L : Tatopoti ma dosanta, martangiang ma hita. Ale Debata Amanami Parasiroha na sumurung! Di pesta parningotan hasasaor ni Tondi Parbadia sadari on, ro do hami tu adopanMu manopoti dosanami. Nunga dipatuduhon Ho marhite HataM na sian ganup bangso do jangkononMu angka na manghabiari Ho jala na mangulahon lomo ni rohaM. Alai sipata do gabe tarambat halak manjanghon Ho ala hupajongjong hami angka dorpi parholangan binahen ni na marasing luat, parhataan dohot houm.

R : Jala sipata do madabu hami tu pamintorion diri, hira holan dirinami na sintong di adopanMu, gabe sai pis mata nami marnida halak na asing.

L : Di na lam maju zaman jala doras nang parsahat ni angka barita masa, laos hehe do nang barita na so sintong (hoax) na patubu pangalaho na masitihaan, manegai parsaoran di keluarga, huria nang masyarakat.

R : Asi ma rohaM ale Tuhan, sai marpamuati ma roham di hagaleonnami i.

L : Sai sundati ma torutoruM asa unang mangonai be tu hami. Sai sesa ma sude dosanami, asa mangolu hami dibagasan asi ni rohaM. Sai pargogoi ma hami, asa margogo hami, marhitehite Tuhan Jesus Kristus Tuhannami, Amen
—-hening elekton….BE. No.172/ BL. 143 –
Bagabaga ni Debata taringot tu hasesaan ni dosanta:
Ise be mangaluhon angka na pinillit ni Debata? Debata do na mamintori. Ise do na mandabu uhum hamagoan?
Kristus Jesus do naung mate, alai ndada holan i, naung mulak mangolu do, jala di siamun ni Debata do Ibana mangondihon hita. Hasangapon ma di Debata na di ginjang!

L+R : Amen.-

07. Marende BE.No.109:2-3 “Sai songgopi hami on” BL. 78
Tondi hasangapon i sai ingani rohanami. Pargogoi ma hami be maralohon dosanami. Asa tung malua hami sian hadosaonnami.

Jolma manisia pe sai sondangi ma luhutna. Asa olo sasude ro tu Jesus Sipalua. Rarat baen harajaonNa tu saluhut manisia.

08. EPISTEL:
L : Hata ni Debata, turpuk di Parningotan ari Hasasaaor ni Tondi Parbadia sadari on, ima na tarsurat di Kolosse 3:5-11: Antong, bunu hamu ma ruasmuna, angka na di tano on: parmainanon, hahodaron, riting ni roha, hisaphisap na roa, ro di pangahution, i ma pardebataon na leban.

R : Alani angka i do lalu rimas ni Debata.

L : Diulahon hamu do angka i najolo, tagan di bagasan i ngolumuna.

R : Alai anggo nuaeng, bolongkon hamu ma saluhutna i: Rimas, muruk, hajahaton, panginsahion hata barangsi sian pamanganmuna!

L : Unang ma masigabusan hamu, ai nunga ditanggal hamu jolma na buruk i rap dohot angka parulaonna,

R : Jala nunga disolukkon hamu na imbaru i, na pinaimbaru, asa tandaonna rupa ni na tumompa ibana.

L : Ndang mardiaimbar disi Junani manang Jahudi, na marsunat manang na so marsunat, bangso na leban manang bangso na so maju dope, hatoban manang anak mata; Kristus i do tahe saluhutna jala di bagasan saluhutna. Ima sahatna. Martua do angka na tumangihon Hata ni Debata jala na umpeopsa, Amen

09. Marende BE. No. 461:1,3 “Songgop tu hami” BL. 407
Songgop tu hami na di joloMon O Tondi ni Debatangki. Uhir patikMu tu rohangkinon O Tondi ni Debatangki. Bereng siholhu di haroroMi, molo Ho ro nda hisar tondingki. Didihon ma tu au on apiMi O Tondi ni Debatangki.
—jongjong –
1. Lehon HataM ima tau podangki, Debatangki na gogo i. Asa sai talu sude musuMi, Debatangki na gogo i. Manghatindanghon tongtong goarMi, asa malua pardosa disi. Asa dijangkon Tuhanta ma i, Debatangki na gogo i.

10. MANGHATINDANGHON HAPORSEAON
L : Tahatindanghon ma haporseaonta i, songon na hinatindanghon ni donganta sahaporseaon di sandok portibi on, rap ma hita mandok
L &R : Ahu porsea di Debata Jahowa…..d.u……..Amen
—- hundul —

11. KOOR :

12. TINGTING

13. KOOR :

14. Marende BE. No.108:1—“Baen ma Gabagaba” BL. 203 (p.pelean Ia,Ib)

Baen ma gabagaba dohot bungabunga nang pelean i.
Ai nuaeng ma jumpang ari parningotan Pentakoste i.
Haroro ni Tondi do ima Tondi Parbadia masuk tu Huria.

—-elekton/musik –
Jangkon ma Ibana ai asi rohaNa ro tu hita on. Asa sondangonNa tiur bahenonNa parrohaon tongtong.
Jangkon ma Ibana da, asa dao sude arsakmu nang pardangolanmu.

—electon/musik —
Tondi Pangapuli sahap na ummuli di sisean i.
Tuhan Jesus Kristus ro ma Ho pabulus tongtong langkangki.
Di na lao tu surgo au pargogoi ma au pamonang sahat tu na sonang.

—electon/musik –

15. JAMITA: Rom 8:9-11

16. Marende BE.No. 476:1—“Ndada au guru di au” BL.322
1. Ndada au guru di au be Jesus do nampuna au. Las rohangku dung hubege Jesus Sipangolu au.
Ref: Ndang be au guru di au Jesus na humophop au nampuna au. Tung saleleng au mangolu Jesus do nampuna au.

2. Ndang di au di Tuhan Jesus daging dohot rohangki saluhutna hupasahat tu Ho Jesus Tuhanhi.
Ref: Ndang be au…

-musik/selecton –

3. Ulaonhu nang artangku pangke ma baen sangapMi. Diusehon Ho mudarMu tung tanda do holongMi.
Ref: Ndang be au….

4. Naung tarsurat do goarhu dibaen Ho tu tanganMi. Laos hupuji ma goarMu salelenglelengna i.
Ref: Ndang be au….

-musik/electon-

18. TANGIANG: Pelean, Pentakosta, Ale Amanami, Pasupasu


Demikianlah Rangkaian Ibadah Memperingati Hari Turunnya Roh Kudus, dalam Bahasa Batak Toba

(Songoni ma Partonding di Ulaon Parninotan Hasasor Ni tOndi Porbadia)

Posted in hasasaor tondi parbadia, Kebaktian MingguTagged ,

One thought on “PARNINGOTAN DI HASASAOR NI TONDI PARBADIA BAHASA BATAK TOBA

Tinggalkan Balasan