Acara parmingguon tarbaru di 1 januari 2020

KEBAKTIAN AWAL TAHUN BARU

ACARA PARMINGGUON PARTANGIANGAN DI TAUN NAIMBARU 2020

01 JANUARI 2020

Masuk Pukul 10.15 WIB HKBP KRAMAT JATI
Distrik VIII DKI Jakarta Raya


ACARA KEBAKTIAN AWAL TAHUN GEREJAWI DI TAHUN BARU, HKBP RESSORT KRAMAT JATI

Pangaradeon

PARTURENA PARTANGIANGAN
BONA NI TAON 2020
DI HKBP KRAMAT JATI
RESSORT KRAMAT JATI

TEMA:
Pahosing Pamaritahonon Di Barita Nauli
Reposisi Pekabaran Injil

Rabu, 01 Januari 2020 ; Pkl. 10.15 WIB

I. PANGARADEON
• Sude Parhalado Marbaju Tohonan Rap martangiang di Konsistori.
• Bongot tu Gareja
• Sude Parhalado jongjong di Altar mardompakhon Ruas

Rangkaian Acara Ibadah Tahun Baru  HKBP Kramat Jati

II. PASAHATHON HATA HORAS DOHOT SELAMAT TAON BARU

Pdt: Hamu amang dohot inang, haha anggi dohot na pinaribot. Horas ma di hamu sude.

R: Horas ma nang di hamu parhalado ni huria on.

Pdt: Nunga sahat hita di Bona ni Taon 2020 on, hami parhalado ni huria on pasahathon tu hamu
amang, inang, haha anggi na pinaribot:
Sude Parhalado:

SELAMAT TAON NA IMBARU MA DI HAMU SUDE. DIPASUPASU TUHANTA MA HITA MAMOLUS TAON NA IMBARU ON.

R: Selamat Taon Na Imbaru ma nang di hamu parhaladonami. Sai dipargogoi Tuhanta ma hamu di taon
2020 on marhaladoi hami sude ruas ni huria on.

Pdt: Naeng ma tabona i mamolus taon na imbaru on dohot panghaporseaon na tongtong do asi ni roha
ni Debata mandongi hita, mamparmudumuduhon hita di pardalanan ni ngolunta. Hata ni Tuhanta mandok:
Sude Parhalado:
JALA HALOMOHON JAHOWA, JADI LEHONON-NA MA DI HO PINANGIDO NI ROHAM. PASAHAT MA DALANMU TU
JAHOWA JALA HAPOSI IBANA ASA IBANA PATUREHON

R: (Mangendehon) BE. 691: 1 “HUPASAHAT MA TU JESUS” BL. 691
( ditingki marende mulak ma parhalado tu hundulanna; paragenda hot di altar )
Hupasahat ma tu Jesus saluhutna ngolungku. Roha nang pambahenanku, saluhutna na tingkingki.
Hupasahat ma tu Jesus saluhutna diringki, hupasahat ma tu Jesus saluhutna ngolungki.

III. PARTANGIANGAN

01. JOUJOU TU PARSAORAN NA BADIA
P: Dongan sahaporseaon di bagasan Kristus Yesus – Naeng bongot ma hita tu parsaoran na badia
rap dohot Debata di Partangiangan Bona Ni Taon2020 on, martangiang ma hita di bagasan rohanta be.
( martangiang na hohom – manghuling musik BE.70 BL.36 sa-ayat)
P: Marende ma hita sian BE.70: 1 – 3 “Naung salpu taon na buruk i”

02. MARENDE BE. 70: 1 – 3 “NAUNG SALPU TAON NA BURUK I” BL. 36

 Naung salpu taon na buruk i, Ho ma hupuji Tuhanki. Ai diramoti Ho tongtong tondingku dohot
dagingkon. Ai diramoti Ho tongtong tondingku dohot dagingkon.

 O Jesus sai asi rohaM, paian denggan ni basaM. Muse di taon na’mbaru on di nasa huriaM
tongtong. Muse di taon na’mbaru on di nasa huriaM tongtong.
( jongjong )

 Sai tong paian hataMi na mangapuli roha i. Alai pangago sasude padao ma sian hami be. Alai
pangago sasude padao ma sian hami be.

03. VOTUM – INTROITUS – TANGIANG

P: Marhitehite goar ni Debata Ama dohot goar ni AnakNa Tuhan Jesus Kristus dohot goar ni Tondi
Parbadia na tumompa langit dohot tano on. Amen.
Sai mangaranapi do matangku dompak angka dolok: Sian dia do ulaning ro pangurupion tu ahu?

R: Sian Jahowa Sitompa langit dohot tano on sambing ro pangurupion ianggo tu ahu.

P: Ndang tagamon loasonna tarsulandit patmu, ndang tagamon nok mata ni Sijaga ho.

R: Sai jagaon ni Jahowa do ho sian nasa parmaraan, sai jagaonna do tondim.

P: Sai jagaon ni Jahowa do ho laho ruar dohot laho bongot, olat ni on ro di salelenglelengna.
Haleluya

R: (mangendehon) Haleluya….Haleluya….Haleluya

P: Martangiang ma hita: Ale Tuhan Debata. Sian asi ni rohaM do umbahen sahat hami tu taon na
imbaru on; Ho do na mangaramoti hami di bagasan taon na salpu i. Sai asi ma rohaM, sai unang tulak
hami nuaeng, sai dongani ma hami di bagasan taon na imbaru on. Pasupasu hami ro di angka ulaon na
denggan, na huula hami marhitehite goarMu. Alai na gumodang, pasupasuhon ma hataM na badia i tu
rohanami, asa gabe na imbaru rohanami, asa tarpamasuk Ho hami tu banua ginjang di hasusuda ni
bohalnami. Amen
( hundul )

04. MARENDE BE. 63: 1, 4 “JESUS HO DO SAI TONGTONG” BL.77

 Jesus Ho do sai tongtong dihaposi rohanami. Nang di taon na’mbaru on ingkon Ho do
dongannami. Tanda hot do padan i dibagasan mudarMi.

 Holan mardonganhon Ho Jesus, naeng mardalan hami. Bintang sipartogi do Ho tongtong di
dalannami. Ai binaen ni sondangMi tiur situtu ma i.

05. PATIK

P: Patik ni Debata di hita di Partangiangan Bona Ni Taon2020 sadari on, tarsurat di Josua 1: 8,
songon on ma didok disi:
Unang meret buku ni patikon sian pamanganmu, sai pingkirpingkiri ma i arian dohot borngin,
asa diradoti ho, jala dipatupa ho, hombar tu sude na tarsurat di bagasan i, asa maruntung ho di
angka dalanmu, jala marmulia parulaonmu.
Rap mangido gogo ma hita sian Tuhan Debata laho mangulahon patikNa i.

S: Ale Tuhan Debata pargogoi ma hami mangulahon na hombar tu patikMi.

06. MARENDE BE.64: 1, 2 “NAUNG MORU DO MUSE SATAON” BL. 192
 Naung moru do muse sataon huhut lam suda bohalhi. Beha do au na sai laon ture do
pangalahongki? Lam ganda haporseaonku nang holong ni rohangku pe. Di Jesus dohot Debatangku nang di
donganku sasude. ( jongjong )

 Aut alusanku Debatangku ra tung maila au disi. Marningot salpu ni rohangku ro di sude
ulaonki. Ai dosa do binaen ni tangan gok dosa nang rohangku pe. Nang pat nang mata nang pamangan
luhut marsala do hape.

07. MANOPOTI DOSA – BAGABAGA TARINGOT TU HASESAAN NI DOSA

P: Dibagasan unduk dohot serep ni roha tatopoti ma dosanta tu adopan ni Debata. Martangiang ma
hita: Ale Amanami jala Debatanami na di banua ginjang. Huparhatopot hami do godang ni dosanami na
huula hami marhite hata nang pambahenannami na so tama. Di bona ni taon 2020 on na ro do hami tu
joloM, sai marpamuati ma rohaM di dosa dohot hagaleonnami.

R: (mangendehon) BE. 67: 5 “Hamu ale donganhu” BL. 12
Pinuji ma goarMu dibaen sude basaMu, manatap na hasea di hami na marjea.

P: Molo hurimangi hami do angka nasailaon di pardalanan ni ngolunami; tung godang na huula hami
mangarsahi dongan na humaliang hami, dongan sajabunami, natorasnami, hombar jabunami, dongan
sahurianami, dongannami saulaon. Ale Tuhan, sai sesa ma sude hahurangannami i; sai unang lalu
rimasMu tu hami, molo so marparbue na denggan do pe hami di taon na salpu. Lehon ma tu hami TondiM
na badia asa tarulahon hami lomo ni rohaM di taon na imbaru on.

R: (mangendehon) BE.67: 6
“Hamu ale donganhu”
BL. 12
Asi rohaM o Tuhan, tangihon pangidoan. Na hupasahat hami tu Ho o Tuhannami

P: Ale Tuhan, sai tatap ma hami ala asi ni rohaM na godang i. Sesa ma saluhut dosanami tu Ho
dohot tu dongannami jolma. Sai paloas ma hami marhahipason jala mangolu di tano na rodop on. Sai asi
ma rohaM di hami ala ni AnakMu, Tuhan Jesus Kristus, Tuhannami. Amen.

( martangiang na hohom manopoti dosa – manghuling Musik BE.67 BL.12 sa-ayat )

P: Tabege ma bagabaga ni Debata taringot tu hasesaan ni dosanta: Adong do di hita sintua ni
malim na songon i, na hundul di siamun ni habangsa ni hatongamon di banua ginjang. Dibahen i
tarbahen Ibana do pangoluhon ro di ujungna angka na sandok ro tu Debata marhitehite Ibana; na
mangolu do Ibana tongtong, asa ditangianghonnasida.
Hasangapon ma di Debata na di ginjang.
S: Amen.

08. MARENDE BE.69: 1, 3
“JESUS SAI URUPI HAMI”
BL. 84

 Jesus sai urupi hami dohot di taon baru on. Paimbaru gogonami mangihuthon Ho tongtong.
Pasupasu ma muse na porsea sasude.

 Taon parasinirohaon baen di au sandok taon on. Lam pahot ma hasesaan ni dosangku di au on.
Holan Ho do Jesuski tuk pasaehon dosangki.

09. EPISTEL

P: Turpuk Epistel di hita di Bona ni Taon 2020 on, tarsurat di buku ni panurirang
JEREMIA 31: 1 – 6, tajaha ma marsoringsoring:
Di tingki ujungna i, ninna Jahowa, ahu gabe Debata ni saluhut marga ni Israel jala nasida gabe
bangsongku.

R: Songon on do hata ni Jahowa. Nunga dapotan asi ni roha di halongonan bangso na malua sian
podang. Laho ma ahu manogihon Israel tu hasonangan ni rohana.

P: Nunga tibu hian diida rohangku Jahowa, ninna ibana do: Haholongon salelenglelengna hubahen
mangkaholongi ho, dibahen i hutogutogu ho marhitehite asi ni roha.

R: Paulionku dope ho muse, asa tung tipak ho, ale boru Israel, marjagarjagarhon arbabmu do ho
muse jala ruar marhalianghaliang rap dohot halak na marlas ni roha.

P: Ingkon pungkaonmu dope angka porlak anggur di dolok Samaria, laos halak na umpungkasa
manganhon parbuena.

R: Ai ro do ari sogot, joujou ma disi halak parjaga di dolok Epraim: Beta ma hita, asa nangkok
hita tu Sion mandapothon Jahowa Debatanta!
P: Ima sahatna. Martua ma angka na tumangihon Hata ni Debata jala na umpeopsa. Amen.

10. KOOR :

11. MARENDE BE.65: 2 “MAJUMPANG TAON NA IMBARU ON” BL. 129
 Dibahen i hupuji Ho O Jesus Debatangku. Ai ndang hea mangulon Ho mambaen partuaonku.
Rohangku panuratan ni godang ni denggan basaMi. Ai Ho do pangurupi.

12. MARDONGANHON DEBATA MAMOLUS TAON NA IMBARU

P: Ganjang do pe sidalananta di taon na imbaru taon 2020 on, marragam angka na masa na naeng
bolusonta. Tung so tarlangkahon hita do sallangka na ture anggo so mardongan Tuhan i. Ala nii,
tajugulhon ma martangiang, ai tangiang do hosa hangoluan di hita mangadopi angka na naeng masa di
joloan on.

R: Rap dohot Ho ma hami ale Tuhan mandalani ariarinami di taon 2020 on. Ai holan raphon Ho do
hami mangolu di bagasan dame dohot las ni roha.

P: Di taon 2020 on godang angka naung tasangkapi siulahononta, sipatupaonta di parsikkolaan, di
parkarejaon, di usahanta, di tongatonga ni rumatangga, nang di tongatonga ni huria. Na denggan ma i
hamu angka dongan. Alai tung so tarulahon hita do i anggo so mardongan Tuhan i. Ala nii, pangasahon
ma Debata di sandok angka siulaonmu.

R: (mangendehon) BE.66: 1 “Debata baen donganmi” BL. 52
Debata baen donganmi lao mangula ulaonmu. Baen Ibana haposanmu sai paserep rohami. Debata
baen donganmi, Debata baen donganmi.

P: Taon 2020 on tahirim do gabe taon parasinirohaon taon on di hita, taon na gok pasupasu dohot
situak ni loba. Nang pe songon i tong do ingkon tagamonta na godang do hasusaan dohot tantangan na
ingkon adopanta. Hamu angka dongan boi do hita manabu tu pandelean, boi do hita lilu gabe tapillit
dalan na so hinalomohon ni Debata ala ni borat ni tantangan dohot hasusaan i. Tongtong ma Debata
tabahen donganta, ai Ibada do haroroan ni hagogoon di hita.

R: (mangendehon) BE.66: 2 “Debata baen donganmi” BL. 52
Debata baen donganmi, molo Debata donganmu, ndang tarbahen ho be lilu, sai ture do langkami.
Debata baen donganmi, Debata baen donganmi.

P: Pos ma rohanta di pandonganion dohot pangaramotion ni Debata. Ndang dung Ibana muba sian
holongNa, satia do Debata di bagabagaNa. Antong hita pe naeng ma tongtong satia tu Ibana aha pe na
masa di pardalanan ni ngolunta.

S: (JONGJONG mangendehon) BE.66: 3 BL. 52
“DEBATA BAEN DONGANMI”
Debata baen donganmi sai na saut do ulaonmu, Sai na tulus do sangkapmu jala sonang rohami Debata
baen donganmi Debata baen donganmi

13. MANGHATINDANGHON HAPORSEAON

P: Rap dohot donganta sahaporseaon di sandok portibi on tahatindanghon ma Hata Haporseaonta i.
Rap ma hita mandok:
S: Ahu porsea di Debata Jahowa……………. ( hundul )

14. Koor :

15. SUNGGULSUNGGUL

16. MARENDE BE.68: 1…… “MASILELEAN ANGKA TAON” BL. 93 (Pel. Ia, b. c)
 Masilelean angka taon ro di ujungna sogot. O Jesus lehon parrohaon na naeng tongtong
marningot. Di halalao ni aringki huhut manimbang ujung ni.
 Diudut Ho hosangki paidaida ahu. Manang adong parbue ni na niulam di ahu. Hape jotjot
tarhirim Ho parbue i ndang olo ro. ( musik )
 Ra naung tarrimas Debata marnida pambaenanku. Ra naung didok tinaba ma hau on na so
dihangku. Ndang olo marparbue i tu aha be hasea i.
 O Jesus sai urupi au, di taon na ro mamboan. Parbue angka na sai tau padaohon hamagoan. Sai
pargogoi ma au tongtong pasangap Ho di ngolungkon.
17. JAMITA: HEBER 1: 1 – 3
18. MARENDE BE.666: 1…. “INGKON DO BOANONTA BARITA” BL. 666 (Pel. II)
 Ingkon do boanonta Barita, tu inganan na holom i. I ma holong nang hasintongan dame na
manongtong i, dame na manongtong. Reff: Ai naung binsar do hatiuron, nunga salpu na holom i. Huaso
ni Kristus hot tongtong salenglelengnai.
 Ingkon endehononta pujian, pasangaphon Tuhanta i. Na tuk manaluhon na jahat, nang sinjata
porang i, nang sinjata porang i. Reff: Ai naung binsar do hatiuron………….
( musik )
 Ingkon do boanonta Barita, Debatanta do Raja i. Dilehon Anak sasadaNa, manobus pardosa i,
manobus pardosa i. Reff: Ai naung binsar do hatiuron………
 Ingkon do hita manghatindangkon Jesus Kristus Partobus i. Asa tu toropna na olo, manjangkon
na sintong i, manjangkon na sintong i. Reff: Ai naung binsar do hatiuron ………
26. TANGIANG PANIMPULI

Sunggulsunggul:
1. Dung simpul jamita annon Papungu Pelean tu jolo do hita tu Haporluan ni Naposobulung HKBP
Pusat.

2. Di ari Minggu na naeng ro, tgl. 05 Januari 2020 marminggu do hita songon na somal:

3. Songon i ma sunggulsunggul di hita di Partangiangan Bona Ni Taonon. Tuhanta ma mamasumasu.

PARHALADO HKBP KRAMAT JATI
RESSORT KRAMAT JATI
PASAHATHON:
SELAMAT TAON NA IMBARU 2020
TUHAN JESUS KRISTUS MAMASUMASU

ACARA KEBAKTIAN AWAL TAHUN GEREJAWI DI TAHUN BARU – HKBP RESSORT KRAMAT JATI



Posted in Tahun BaruTagged ,

One thought on “Acara parmingguon tarbaru di 1 januari 2020

Tinggalkan Balasan