golgota acara peringatan kematian kristus 2019


GOLGOTA

“Punguan na hohom di parningotan ni hamamate ni Tuhanta Jesus”

HKBP KRAMAT JATI ACARA – PUKUL 14.00 WIB


Ende No. 88:1,4 (BL 106)

1. Jesusku naung manobus ahu, sai naeng haholonganhu Ho; Tu dolok Golgata Ho laho, nionjar ru holongMu do, Hupuji nasa asiMi alai gumodang holongMi,

4. Bagas uhirhon to rohangku panghophopMi humophop au; Tu si ma togu pingkiranhu guru di Ho sambing ma au, Hupuji nasa asiMi alai gumodang holongMi.

Jongjong ma hita saluhutna di bagasan hahohomon !

Marhitehite goar ni Debata Ama dohot goar ni Anakna Tuhan Jesus Kristus dohot goar ni Tondi Parbadia na tumompa langit dohot tano on. Amen.

Na gabe pangoloi do Kristus paima mate pola tung mate tarsilang. Di dia angka soropmi ale hamatean? Di dia pangagoonmu ale banuatoru? — taendehon ma Haleluya

Martangiang ma hita :

Hundul ma hita saluhutna.

Tatangihon ma sian Hata ni Debata na tarsurat di: Rom 6 : 3-5.

Na so diboto hamu do on? Sude hita nasa naung tardidi tu bagasan Kristus Jesus, tu bagasan hamateanNa do hita tardidi. Antong, naung tartanom do hita rap dohot Ibana marhitehite pandidion i tu bagasan hamatean asa marparange hita di bagasan ngolu na imbaru, songon Knstus naung hehe sian angka na mate hinorhon ni hasangapon ni Amana. Ai anggo nunga sangkambona hita dohot Ibana di na rap mate i hita rap dohot Ibana i, suang songon i ma hita nang taringot tu haheheon.
Amen.

  1. Ende No 84:1 (BL. 195)

Aut na ginorga tu rohangku bohiM di na laho mate Ho. Aut na haingot o Tuhanhu, tongtong panghophopMi di au. Ai Ho do paluahon ahu dosangku do pinorsanMi, Didaoni Ho parsahitonhu, martua au binahen ni i.

Gorga ma tu roham ale angka ama parsinuan tunas [1]. Uhirhon ma tu tondim ale angka ina parsinuanbeu[2], pangkilalahon ma ale siadosan[3] parpangarudok[4] na togos[5]. Ida ma Tuhanta i, nunga gantung Ibana di silang i. Bege ma, nunga dipangiar Jesus soarana. Tangihon ma, nunga marsoara na gogo Ibana mandok, Eloi, Eloi, Lama Sabachtanei — Ale Debatangku, Debatangku, boasa tung tadingkononMu Ahu?

Debata ditadingkon Debata? Ditadinghon? Nunga ditadinghon jolma Ibana, nunga ditadinghon angka siseanNa, gari mata ni ari nunga naeng manilu manadinghon Ibana.

Ida hamu ma jolma i, ninna si Latus na sangap i. Beha ia ho tadinghononmu do i? Dohononta ma, patut ma antong parmudarhononhu na tinaon ni Tuhanki asa marpanghorhon i di ngolungki. Ala ni i, hupaunduk ma simanjujunghu, hupatungki ma panailingku, hupahusorhusor ma na tinaon ni Jesus i anggiat jumpangan tua dohot dapotan ngolu ahu sian ni Tuhanki. Asa hisar tondingku siala parlungunonna i. Ndang tarbahen so masinunuton[10] ahu ganup ari di siulubalangari[11] on molo hupahebaheba ngolungkon sitaonon ni Tuhanki.

Tardok hira na tolu hata do na manghamham partinaonan ni Tuhanta ro di hamamatena i, songon batu mardalihan na so tarsirang. Patut ma tapeop i. Mangkuling ma Ho Tuhan sian silangMi, mananginangi do hami na dangol on. la sitolu hata na ginoaran ondeng, angka on ma na gabe hata mutiha ni sitaonon ni Tuhanta i.

  1. GABBATA : …
  2. VIA DOLOROSA :  …..
  3. GOLGOTA :  ….

 

  1. Ende no 76:2 (BL. 199)

Ingkon sai Ibana ingotonku, uju na tarpajal i.
Tu hau pinarsilang ginantungkon, sai mabaor mudarNa i. Ai humophop au ditaon uasNa, asa dohot au muse upaNa. Ai ditatap do au on, di pandokNa: “Nunga sun !”

  1. Ende No 83 :1 (BL. 214)

Na lao do Birubiru i, Mamorsan angka dosa. Ni nasa hajolmaon i, Di benget ni rohana.   Diporsan do sahitta i Di lehon do DiriNa i.   Tu tangan ni pamunu, Ditaoni do na bernit i.  Ro di na tos hosaNa i, Didok : Naeng porsanonku.

  1. Ende No 81:3 (BL. 185)

Bugang sada tanggurungMu Di na hona linsing i Hamamalum ni bugangku na di rohangki do i ,  Ho do gabe binuraan au dapotan hangoluan. Ala ni hupuji Ho tung marribu hali do

Paula so diida ho do Tuhanki , nunga dilasahi! Tajom, tajom ni suga ni sungsang duri i.

Ima hape gabe tumpalMu ale Tuhanku? Tung tolong, sanggar na marbarutu i ma gabe tungkotMu? Nunga disoro tolong i, nunga dilasakhon tu sungsang duri na di simanjujungna i. nunga manirisi jala manetehi  mudar sian simanjujung ni Tuhanki. Pareso ma, nunga marhimpal-himpal  be simanarup[28] na i. Ai marbirsahan do tusi mudarNa i. O Latus. O Sintua ni malim, tumagon ma di ho si Barabas si partodos i, sibunu jolma panggunturi i?

Anggo tu si songon na didok ho do, muli ma damang, topot ma jabum di na nidokmu “Tagonan si Barabbas dipalua”.

Pardosa na sumalin di hasiholoi ho? Hape anggo Jesus na so marpipot i ingkon soroonmu jala tijuranmu? Ingkon lasahanmu? Ingkon leaanmu? Ingkon pasiaksiakhonmu? Aha tagamon rugim ale, dibahen Jesuski? Nda holan laba dohot pasupasu do na ro sian Tuhanki? Giahan ho di na tama ale sintua ni malim?

Nunga sap mudar simanjujungni Tuhanki, aha ma bahenonhu mangapusi i? Tung pinapungu pe sandok saputangan ni manisia, ndang tuk be anggo mangapusi i. Hamubaon ni rohangku, dohot hamubaon ni roham do na boi mangapusi i.

  1. Ende No 78:1 (BL. 158)

O ulu na sap mudar binaen ni bugangMi. Na sian jangarjangar sisungsang duri i. O ulu hatongamon hian do tumpalMi. Ditaon Ho haleaon Ho naeng sombaonki?

Ida ma, tung pasombuonmu dope soldadu i? Nunga loja, jala maheu Tuhanki, alai pulut do roham ale soldadu palaluhon tangamu na gintal i tu salop[29] ni Tuhanki. Aha manggitik roham umbahen ingkon pastapanmu dope simangarudop[30] ni Tuhanki?

Na so adong do habidingan[31] ni tanganmi? Pasombu tagas ho tu Tuhanki na so ra mangalo i, na songon biru-biru na sai hohom maradophon sigustingi ibana? O Jesus diparsipal pe Ho, sai manaon-naon do Ho, ndang manang mangkuling pamanganMu. Songon biru-biru na hohom maradophon jolma sigustingi ibana. Tung na so dibuha Ho do pamanganMu. Ndada na sotarbahen Ho nian tutu padirihon lobi sian sampuludua loksa surusuruan laho mandopang angka panggunturi i, alai manaon do Ho! O ale tondingku, patangkas ma na niae ni Tuhanki.

  1. GABBATA

Gabbata, na so olo do ho hona tijur umbahen na pabalionmu tijur ni ratorop i tu bohi ni Tuhanki? Pamanat ma pamangan ni soldadu     i so diboto be manang tu dia bahenonna tijur na nialap ni dosana sian sitalbeonna[32] i. Ida ma, nunga dipahure sialap ingkauna i songon na mambebeati Dipabursikkon ma ijurna to bohi ni Tuhanki. Bohi na lambok malilung, bohi na basar i. So hea i marhalingking[33] i ala ni na muruk. Sai ellem[34] do i. Hape ida ma, nuaeng nunga sap tijur be i. Bohi na minar i, so jumpang late dohot hosom di si. Gari tu siseanna so hea pola salpu hata ni I. Gariada tahe sai lambok do bohina ro di na laho mamuri pat nasida pe uju i. Anggo nuaeng nunga marlangan i, jala sap tijur do.

  1. Ende No 78:2 (BL. 158)

O bohi parsinondang Na sangap situtu. Beasa tung marlangan sap ijur hurumMu? Tung aha ma alana Umbaen homur mataM? Na mintop do sondangna Di na lao tos hosaM.

  1. VIA DOLOROSA

Nunga nirimpu montok ma na masa i. O Jesus, ndang tinagam ingkon marudut be anggo marnida hinadangol ni na niaeMi. Hape, hape, bereng ma o manisia, nunga disoro jala ditogu Jesus i songon birubiru na tinogu tu pamotongan huhut manetehi mudarNa i. Via Dolorosa, lapang haberniton, padang harorobur. Nunga modar daging ni Tuhanki. hape pamanat ma, boasa tung pasombuonmu dope Tuhanki mamorsan silangNa i? Tiang na balga, naung pinsamban i. Hape nuaeng ingkon ampe ma i tu tangkuhuk ni Tuhanki na so marnangon i be.

Bereng ma, nunga borhat induk ni soldadu ni halak Rom. Nunga dienjak hodana, ihut do tusi angka soldadu marlotom-lotom patna i sian las ni rohanasida be rap dohot angka sinjatana pe. Hape adong ma deba muse di pudi ni i na maniop papan tulis panuratan ni sala ni na hona uhum i. Pajenek ma, jaha ma. Didok di si : Jesus Nazarenus Rex Judaiorum manang dipapandek INRI. Lapatanna, Jesus na sian Nazaret Raja ni Jahudi.  Ihut ma muse tu si Jesus na mamorsan silang i niundurhon ni angka natorop rap dohot sarongkanan nari soridadu.

Ndang hapalang be surak-surak in sintua ni malim i rap dohot sintua ni natorop i, dohot angka siboto surat pe, ai nunga disuhung[36] be Jesuski, ndang adong be alo-alonasida di rohana. I da ma nunga naeng tungkap Ibana, nunga sonsam[38] Tuhanki tu jolo dionjar silangna na borat i. Hape marpalait dope muse samboksambok na marsuga-suga tu dagingna mandok asa hinsat. Alai ndang tarbahen be.

Ndang tarpaidaida angka ina na mangihuthon Jesus i be na masa i. Gabe marsaburan ma ilu nasida be tumatangis mangandungi. Hape, ruar dope panurirangion sian simangkudap ni Tuhanki mandok unang ma Ahu tatangisi hamu ale boru Jerusalem, dirimuna dohot anakhonmuna ma. Ndada diriNa disarihon jumolo, alai natorop i do na rumingkot. Anggo Ibana dipatutoru do jala gabe pangoloi paima mate, pola tung mate tarsilang.

Tuani ma disi si Simon halak dagang pangaranto na sian Kirene i. Dohot paksa, gabe ibana ma digogoi nasida mamboan silang i. Idaon songon na asi roham di Jesuski ale soridalu. Hape, ndada na marasi ni roha ho hape, alai asa tung ingkon sahat do Jesuski tu partangkurahan i didok roham asa tung haru diparsilangkon.

Nanget-nanget, tuat ma nasida sian dolok Zion i. Nangkok ma muse tu robean ni partangkurahan i…. Nunga mandok sahat nuaeng . . .

  1. GOLGOTA

Nunga dipajongjong silang ni Tuhan i…..

Golgata – Gulgoleth – Gulgutha,  lapatanna partangkurahan. Agan pe adong dua nari na tarsilang i, i ma angka parjahat di Golgata on, ndang adong laho roha ni halak painondur tusi, ai pangalaho naung soma do sisongon i. Alai anggo tu silang ni Tuhanta i, silang na so hea masa dope i, halongangan bolon do i. Anak ni Debata tarsilang, Tarsilang? O Golgata, Golgata, boasa ma gabe partangkurahan ho? – ia tung sian rupam pe tarida do nian ai madabu tulpang tu gambo, mardomu do rupa tu pangalaho. Ia rupam nda mardomu do tu pangalahom. Goarmu pe Golgata, lapatanna partangkurahan. Aha ma tagamon umbahen songon i goarmi?

Adong namandok, ho do ninna manabunihon tangkurak ni si Adam na parjolo i. Hape laos ho muse naeng manabunihon nang tangkurak ni si Adam na paduahon i? Pulut roham naeng manabunihon tangkurak ni Tuhanki? Boasa ma pasombuonmu soldadu i marhobas mambuat tongkokna dohot labangna na ganjang i?

Ida ma, tarhona dope tahe na deba mambuat tuak anggur na marsaor pogu. Amang, nda gabe songon ubat sipamate pangkilalaan ma i asa unang diae Tuhanki di rohana na bernit i? Alai, dirimpu ho ma, jaloon ni Tuhanki anggur sipalensemmi. Nda dibereng ho ditulak do silelionlehonmi ? O, ale manisia ni siulubalang ari, tung tuak anggur na marsaor pogu ma hape silehonlehonmu tu Jesus na mamorsan dosam i?

Nuaeng, palaluonmu ma tanganmu na girgir manongkok i ale soldadu? Ai sadia huroha dijalo ho upam manongkokhon labangmi? Boasa ma pasombuonmu simanjojakNa na ringgas mangalangka laho marjamita i nuaeng ditambat?

Ida ma, nunga dibuat labang na ganjang i. Tung so hitir do tanganmi ale soldadu maniop labang na songon i ganjang? Nunga dipadonok ho tu tangan ni Tuhanki, ida ma nunga diantuk dohot tongkokna tu silang i. O Jesus, tanganMu  na sai mamasumasu i, ingkon labangon ma i? Nunga marlajak mudar i sian simangidoNa maniris dohot sian simanjojakNa i.

  1. Ende No 81:5 (BL.185)

Tung tanganMu dohot patMu ditorusi labang i. Jadi tiris ma mudarMu sian hau parsilang i, I do mual paridian di au jolma na hansitan. Ala ni hupuji Ho tung marribu hali do.

Nunga lam tu nangkokna mata ni ari. Ida ma nunga pukul sia manogotna. Nunga jongjong be silang ni Tuhanki, nunga gantung Jesus Anak ni Debata di hau parsilang. Sungkot tu langit, so dais be tu tano, nunga di tongatonga Ibana. Saut ma Ibana nuaeng gabe sipadomu jolma na di rura partangisan on dohot Debata Amanta parholong na di surgo hasonangan i.

Hape ihut dope muse duanari parjahat tarsilang mangkaliangisa. Ida ma riburna i angka painondur i. Angka sintua ni malim dohot siboto surat, sintua ni natorop i rap mangupir-upirhon uluna be huhut mandok angka hatana be laho pauru-uruhon Jesus mandok: Pe Ho, na mangalohai bagasjoro i jala na pajongjonghonsa di bagasan tolu ari. “Palua dirim jala mijur ma Ho sian hau na pinarsilang i”.’

Nang dung gaung Tuhanki ale sintua ni malim, ndang sombu dope roham? Boasa sai babaanmu dope? Sai pambebeatanmu dope huhut mandok: “Palua dirim, molo na tutu Ho Anak ni Debata, mijur ma Ho sian hau pinarsilang i?”

Angka soldadu i pe dohot do pauru-uruhon Ibana. Dibuat do abit ni Tuhan i, dibagi-bagima, didabu dope tondungna tu sampe-sampena i. Opat do soldadu i, ba, diparopat ma abitna. Alai tading ma sampesampeNa. Tondung, ma dibahen laho marbagi-bagi. Ndada ala ni malom martondung i ale soldadu, ndada ala ni parenta ni induk i, alai tung na pasauthon lomo ni roha ni Debata do i, ai na tarurat do “dibagi do abitna. Tondung do dibahen taringot tu sampe-sampena”.

Gari donganna na targantung i tahe, parjahat na sumalin dohot do mangaleai Ibana. Asa nunga tung sange sude horong manimpalhon insakinsak tu Ibana.

Alai sangkababa hata pe ndang dibuha pamanganNa. Dipaula so dibege do soara ni natorop i. Tongtong do hata holong haruar sian pamanganNa. Tuani maa disi ho ale parjahat na sadanari, ai muba do roham siala ni silang ni Tuhanki, tuani ma di si ho maminsang donganmu parjahat i. Tabo do hatam i mandok: “Ndang dihabiari ho Debata, atik pe rap hona uhum hita, O Jesus, ingot ahu dung sahat Ho to harajaonmi”.

Nian anggo roha mandok, nda mangontahi ma bugangna i. Hape anggo Tuhan i tenang do marsoara sian silang i. Silangmi, silangmi i do haluaonki.

  1. Ende No 86:3, 5 (BL.67)

Ro do au nuaeng tu Ho sai palambas ma rohaM, nunga pola Mate Ho,

ala asi ni rohaM, jangkon au na dangol on, sai ulosi tondingkon

Silang na badia i Ho do lombulombungki. Molo puas hodokki

Di na suda bohalhi. Di sude sitaonon i Ho ma lombulombungki. 

Bege ma,  nunga mangkuling Jesus, on do hataNa sian silang i:

“Ale Amang, marpamuati ma rohaM mida nasida, ai ndang diboto nasida na binahennasida i”.

Ndang dao Debata sian Ibana. Songon pangkataion ni na paadop-adop bohi do soara ni Jesus, didok ma: “Ale Amang, marpamuati ma rohaM …”

Nda na haruar sian mata mual holong ni roha do i? Ise ma na tuk mandok songon i? Halak na mangalasahi Ibana, na manilangkon i, diondihon dope jala diparamothon. Ai ndang diboto nasida nabihennasida i. Aha be nian na so diboto sintua ni malim i, alai dipaula so diboto be do. Hape agan pe songon i ndang na marnamontok holong ni roha ni Tuhan Jesus. Ai bidang pe tao, umbidang do holongNa i, bagas pe laut, umbagas do holongNa i, timbo pe langit, turnimbo do holongNa i.

Situtu do hatangkon tu ho, sadario on do ho rap dohot Ahu di Parideiso.

Tu parjahat nu di siamunNa do nian hata on. Alai tu ho dohot tu au do deba pangonaina.

Nda hata sipanglambohi tondi do i? Sian dia ma tagamon boi puas hata si songon i? Holan sian mata mual haluaon i do i. Ndang olo mansohot mual haluaon i mamaorhon pasupasu tu na paubahon rohana. Agan pe di tano on tarbege soaraNa, alai anggo isina nunga diparadeido. Ido umbahen na didok: “Sadarion do ho rap dohot Ahu diparadeiso”. Agan pe di hau i dope gaung-gaung ale parjahat, alai ala dipauba ho roham, ala ni i nunga tubu haum di paradeiso ni Debata.

Ndi ma inang anakmi, ndi ma inangmi.

Ndang dipalingkang[45] inana si Maria i antong tampuk ni pusupusuna naung gantung di silang i. Dipamanat Jesus do i, didok ma: “ndi ma inang anakmi”.

Nda jamita parsaoran na rongking[46] do i? Asa marpartalian hasadaon ganup na porsea di Ibana, nirahut ni silang i. Nunga mandao-dao jongjong angka na mananda Jesus i, songon i muse nang angka parompuan na mangihuthon Ibana sian Galilea. Beha ma tahe, ndada tiala[47] roha, ai gari si Petrus pe pola do dipambuburahon dirina, paboa na so ditanda Jesus i.

Alai, ianggo si Maria inaNa i, rap dohot si Maria ni si Kleopas dohot si Maria Magdalena, jongjong do di lambung Jesus na di silang i. Ndang tarpabereng-bereng Jesus be ina pangintubuna i, songon i muse nang inana si Maria, ndang tarpaida-idasa be anak haholongan na i. Ua dompon ma roham inang aut adong anakmu na songon sagak[48] ni panabian laho ne tu toru ni situmandok,[49] nda ingkon maheu ho ‘paidaidahonsa? Mamereng i ma Jesus, gabe marsoara mandok: “Ndi ma inang anakmi, pos ma roham, pir ma tondim”

Mauas Ahu.

Di jolo ni on dilehon do nian siinumon, alai ndang dijalo, hape nuaeng nunga dipangido. Nda saut do songon na tarsurat di Padan na Robi hian taringot tu Ibana di na nidok ni par-Psalmn i “Merus do gogongku songon ngar-ngar, jala lohot do dilangku di langit-langit ni pamanganhu jala tu orbuk ni hamatean dipapodom Ho ahu”[50]. Jesus mual hangoluan nuaeng gabe mauas. Songon na dipurun dihilala, gabe dijouhon Jesus ma “mauas Ahu”. Asa saut do sombu uashu ia mauas pe Jesus i. Ndang pola be dohot ahu muse manjouhon di ujung ni langkangku “mauas Ahu”. Tutu godang do na huhauashon di portibi na mangilas on, alai nuaeng gabe sombu ma sudena i, ala naung diporsan Jesus di silangNa huhut mandok “mauas  Ahu”.

ELOI ELOI LAMA SABACHTANEI

Ale Debatangku, Debatangku, boasa tung tadingkononmu Ahu? Nunga songon halak-halak na tarpunjung, songon tandiang[52] na hapuloan[53], Jesus di silang i. Dibereng humaliang, holan Ibana nama na punjung di hau i. Tu dia ho ale angka sisean na sai rap dohot Ibana nasailaonna i? Nunga tu dia ho ale Petrus? Nda didok ho do na so tupa tadinghononmu lbana? Nunga tu dia ho ale Lazarus? Nunga tu dia ho ale angka na bosur siala roti sisaotik na sian Jesuski? Tu dia ho ale manisia?

Diida ma tu ginjang, songon na dipatait Debata BohiNa. Dung i manganggukbadar ma Ibana. Anggukbadar[54] na badia do on mandok: Eloi, Eloi Lama Sabachtanei. Ale Debatangku, Debatangku, boasa tung tadingkononmu ahu? Ndada na mamurai, ndada na mandele manang mamulasi Jesus di anggukNa on. Asa tung paltak do tahilala bagas ni pangkaholongi ni Debata di panghophopNa i di hita, ai songon i ma bernit ni sitaonon i ala ni dosanta. Ala ni i angka dotdot ma ho ale tondingku, angka hitir ma ho umbege anggukbadar na badia i, ai ho hian do tama manganggukhon i ala ni hajahatonmu. Hape nunga dijoloani Anak ni jolma i manganggukhonsa.

Ale Amang, tu bagasan tanganMu ma hupasahat tondingKu.

Jesus na burju mar-Ama i, Jesus Anak Sipangoloi i, ndang dung mangkalupahon AmaNa na di surgo i. Sian mula ni ulaonNa sahat ro di ujung ni ngoluNa, sai tong do ngolu na marpandapotan tu Amana i. Nuaeng pe ndang tu hamatean i diodothon TondiNa. Ndang lupa Ibana pasahathon arta na umarga i tu AmaNa. Dipagomgomhon do tu AmaNa na di surgo i tondiNa i, didok ma “Ale Amang, tu bagasan tanganmu ma hupasahat tondingKu”. O hamu huria ni halak Kristen na badia, nunga dijoloani Anak ni Debata soaram manjouhon asa diingot ho pagomgomhon ngolum dohot tondim tu tangari ni Amanta na di surgo i. Sintong do molo taparhatopot marhite ende :

  1. Ende No 383: 1 (BL. 383)

Adong do Ama na di surgo i, Tuhan Jahowa Debatan ta i. Di jou do au, nalao ma au,, Tu Ama na di surgo i.

Lao ma au, Lao ma au, Tu na di surgo i. Lao ma au, Lao ma au, Tu na di surgo i. Di jou do au na lao ma au, Tu Ama na di surgoi.



NUNGA MARUJUNG

Aha do na marujung? Nunga marujung angka ulaon dohot paraloanNa i. Nunga marujung nang silangNa i. Nunga marujung sitaononNa i. Andorang so dipaunduk dope simanjujungNa i, nunga mulai mandele mata ni ari i marsinondang gabe mangholom ma sandok tano on.

Ndang tarpaidaida mataniari i be Tuhanki na sai gantung i. Songon na maila mataniari i marnida bohi ni na sai marsinondang nasailaon. Disonggak sinondang ni asi ni roha ni Jesus i do sinondang ni mata ni ari i, ujungna gabe dipaholom mata ni ari i ma dirina. Molo adong sian hamu ale jolma manisia parhapistaran portibi mandok: “gerhana ni mataniari do i” – uji ma paresohon tu tingkina manang na cocok do i? Jempek do alus tusi mandok, ndang.

Molo adong dope sian ho ale portibi na mangilas mandok, timus ni dolok marapi- na mapultak do i, tangihon ma pandok ni parpandebisuk mandok, ndang. Antong aha do i? Mangholom mataniari i, gabe mangholom ma sandok tano on. Gabe songon na alang so tarida nama Tuhanta i di silang i. Ale mataniari, boasa so mangkidop be ho? Tagamon naung ditatap ho do na so mangkidop be simalolong ni Tuhanhi?

Nunga mamirong humaliang. Disi ma dipagogo, dipangiar Jesus soaraNa mandok: “Nunga marujung”, jadi tos ma hosana. (Jongjong ma hita saluhutna jala martangiang dibasan rohanta be)

Mangkuling giringgiring pitu hali, jongjong ma sude di bagasan hahohomon martangiang. Di na huhut mangkuling giringgiring, dipalu ma potimarende angonangon Ende no 412  BL. 10. Dungi di uduti ma marende 412.

  1. Ende No 412 ayat 1, 2 (BL. 387)

Ndi di dolok adui silang ni Tuhan i, sap mudar sap ijur do i, Jesus mate disi asa malum dibaen sude angka gondok roha i, Di baen i tung holong rohangki, mida silang di golgata i, hu pasolhot diriku tusi, dompak surgo pardalananki.

Di leai jolma i silang ni Tuhan i, hape haluaon doi, nang godang dosaki, alai sesa do i di baen mudar na durus disi. di baen i tung holong rohangki, mida silang di golgata i, Hu pasolhot diriku tusi, dompak surgo pardalananki.

(Dung sidung ende on hundul be ma satongkin)

Nunga tos hosa ni Jesus i. Nunga marujung be dibahen Ho ale Tuhan. Alai ida ma, nunga laos godang naung jumolo borhat mangihuthon Ho sian bagas ni halak Kristen di portibi on. Sian ruas ni Huria on pe nunga torop na laho mandapothon Ho. Beha, nunga rap ho ale haholongan dohot Jesusmi naung jumolo borhat sian ho? Aha do labangku sian hamamatem i ale Jesuski?

Aha ma upangku sian padangharoburanmi ale Tuhanku? Ingot ari hamamatem ninna angka na porsea na parjolo i. Pasolhot ma hamamatem amang, inang, tu hamamate ni Jesus i. Ia hamamatem ale Jesus, gabe hamamate ni hamateanhu do i hape. Ia hamamatem ale Jesus, gabe pintu hamasuhanku do i tu surgo hasonangan i.  Ai marhite i do diparade ho inganan na so nang i.

Ianggo Letnan ni soldadu na manjaga pamajalan i, gabe dipuji do Debata, ninna do, tutu do halak on na tigor roha, jadi sude natorop i na marluhut mainondur, masitompuk andorana be do marnida na masa i laos mulak ma.

Tama manghorhon las ni roha do di hita hamamate ni Jesus on, ai diungkap do di hita dalan to haheheon sian hamamatenta dohot sian hinambor ni naung jumolo monding sian hita pe. Nuaeng pe, patut ma hita manompuk andoranta be laos mangandehon, Tutu na mate Jesus i (jongjong ma hita saluhutna).

  1. Ende No 426:1 (BL.286)

Tutu na mate Jesus i humonghop iba on, durus di hau parsilang i mudar na i tongon, songon i tutu, songon i tutu, Umbaen na mate Jesus i siala au do i.

Rap mandok tangiang :  Ale Amanami – Pasupasu:

 

 



“Punguan na hohom di parningotan ni hamamate ni Tuhanta Jesus”

Oleh :

Ds P.M. Sihombing.